Accessibility links

дүшәмбе, 5 декабрь 2016, Казан вакыты 15:37

Başqortstanda yaña bäysez oyışma tözelä


16 sentäbr könne Başqortstan başqalasında bik möhim säyäsi – ictimaği waqıyğa buldı. Respublikadağı 20gä yaqın ictimaği xäräkätlär, milli oyışmalar häm partiälär citäkçeläre häm aktiv wäkilläre Ufada cıyılıp berlektäge kiñäşmäsen ütkärde. Anıñ maqsatı – Başqortstanda xakimiätlär belän bäxäskä kerä alırlıq häm respublika xalqı xoquqların nıqlı yaqlıy alırlıq berlektäge yaña oyışma tözü ide. Aldan äzerlängän köntärtibennän ük kürenüençä, ictimaği oyışmalar häm partiälär wäkilläreneñ Başqortstanda «Bäysez ictimağıy palat» digän yaña oyışma tözergä niätlänüen añlarğa mömkin ide. Kiñäşmägä respublikanıñ kiñ bilgele oppozitsiä köçläre, kürenekle şäxesläreneñ cıyıluı anıñ däräcäsen kütärde. Respublikta Bäysez İctimaği palata oyıştıru täqdime belän 7 partiä häm ictimaği xäräkät çıqqan. Alar arasında Başqortstan Tatar oyışmaları berlege, urıslarnıñ «Rus'» ictimağıy xäräkäte, «Yabloko» partiäse häm başqalar bar. Kiñäşmäne açıp, «Rus'» ictimağıy oyışması räise Anatolıy Dubovskiy Başqortstanda Bäysez ictimağıy palat oyıştırunıñ bügenge köndä bik waqıtlı ğämäl buluın asızıqladı. Anıñ süzlärençä, älege palatnıñ Rusiä prezidentı Putin tözergä täqdim itkän ictimağıy palat belän ber urtaqlığı da yuq. – Bezneñ respublikada xakimiätlär tarafınnan Putin telägän ictimaği palat da tözeler, älbättä, – dide Dubovskiy äfände. – Ämma äle bez tözi torğan ictimaği palata, isemennän ük kürenüençä, bäysez palat bulaçaq. Utırışta artaban süz alğan Tatar oyışmaları berlege räise Ramil Bignov ta Başqortstanda xaqimiätlär belän bäylänmägän Bäysez ictimaği palata tözüneñ zur ähämiätkä iä buluın bilgeläde. – Respublikta iqtisadnıñ yıldan– yıl asqa tägäräwe, keşe xoquqlarınıñ tupas bozıluı, xakimiät strukturalarındağı kiñ cäyelgän korrupsiä küreneşläre häm başqa tiskäre xällär bezne – ictimaği xäräkätlär häm partiälär wäkillären üzennän – üze berläşergä etärde, – dide Ramil Bignov. – Älbättä, bez respublikanıñ xökümäten häm başqa citäkçe oyışmalarnı almaştırırğa isäp totmıybız, ämma ictimaği oyışmalar häm partiälär respublikada barğan xällärgä yoğıntı yasarğa, üz süzen äytergä, ğädi xalıqnı yaqlarğa burıçlı. Xakimiätlärneñ tege yäki bu xataları buyınça bez üz däğwalarıbıznı qatği belderergä xoquqlıbız. Utırışta çığış yasağan Başqort Xalıq kongressı citäkçeläreneñ berse, tanılğan oppozitsiäçe Ayrat Dilmöxämätov respublikta xäzerge xaqimiätlär ğayıbe belän kilep tuğan awır xäl turında söyläde. Anıñ süzlärençä, moña qädär respublikta xaqimiätlärneñ eşçänlegennän qänägät bulmağan oyışmalar häm partiälär küp bulsa da, alar älegäçä tarqaw buldı häm ayırım – ayırım ğına eşläde. Xäzer inde cämğiätne awır xäldän çığaru öçen barlıq ayıq aqıllı keşelärgä häm ictimağıy oyışmalarğa, partiälärgä berläşü waqıtı citte. (audio) Ayrat Dilmöxämmätov äle tözelüçe Bäysez ictimaği palatanñ zur köçkä äylänäçägenä ışanıç belderde. – Kiläçäktä Bäysez ictimağıy palat respublika xakimiätlärenä tege yäki bu mäsälälär buyınça sorawlar häm taläplär quyarğa, şul sorawlarğa cawaplar alırğa täesire bulırlıq oyışmağa äyläner, – dide Ayrat äfände. – Respublikta xaqimiätlär dä, quät oyışmaları da, ğomumän, citäkçelek dairäsendäge barlıq oyışmalar xalıq aldında cawap tota torğan wäzğiät tudırırğa kiräk. Başqa çığış yasawçılar da Bäysez ictimaği palatanıñ respublikada yoğıntılı oyışmağa äylänüenä ışanıçın äytte häm anıñ eşçänlegen näticäle oyıştıru öçen üzläreneñ eşlekle täqdimnären äytte. Kiñäşmädä qatnaşuçılar Bäysez ictimağıy oyışmanıñ räisen häm urınbasarın sayladı. Räis itep bertawıştan «Rus'» oyışması citäkçese Anatolıyy Dubovskiy saylandı. Artaban yaña oyışmanıñ eşläw tärtibe raslandı häm anıñ berençe möräcäğäte qabul itelde. Yaqın kiläçäktä Bäysez ictimağıy palatnıñ nizamnamäse äzerlänäçäk, annan anı räsmi terkäw eşläre başlana.

XS
SM
MD
LG