Accessibility links

дүшәмбе, 5 декабрь 2016, Казан вакыты 01:33

Kuşnarenko rayonı üzägendä moñarçı bulmağan qarşılıq çarası ütte


Uzğan ber proğrammabızda Başqortstannıñ Kuşnarenko rayonındağı cäncal xaqında söylägän idek. Bu rayon üzägenä berniçä yıl elek biş – altı ğäilä körd milläte wäkilläre kilep urnaşa. Urındağı xaqimiät alarğa yäşäw häm eşläw xoquğı birä. Kördlär biredä töplänep alğaç, üz eşlären dä açıp cibärä. Şäxsi eşquarlıq belän şöğellänüçe kördlärgä üz bazarların buldıru öçen urın birelgän. Şul uq waqıtta xaqimiätlär urındağı eşquarlar moñarçı eşlägän bazarnı yabalar da, alarğa kördlär qulına tapşırılğan bazarda säwdä itärgä quşalar. Ämma rayondağı tatar häm urıs eşquarları monıñ belän kileşmi. Kördlär üz bazarlarında säwdä itü öçen qıymmät bäyä ala, dip belderä alar. Kuşnarenko rayonı xaqimiäte ğämällärenä rizasızlıq belderüçelär rayon xaqimiäte binası qarşında miting ütkärde. Anda ber meñ yarımğa yaqın keşe qatnaşqan. Uram cıyının oyıştıruçılarnıñ berse – rayonnıñ «Bol'şewik» kümäk xucalığı räise Fähim Qorbanov bu aqsiäneñ kördlärgä qarşı oyıştırılğan çara bulmawın äytä, yağni bu oçraq millätara ızğışnı añlatmıy. Älege qarşılıq çarası rayon xaqimiätläreneñ eşquarlarğa törleçä qaraşına rizasızlıq belderü häm ğädellek taläp itü çarası ğına. Soñğı yıllarda Kuşnarenko rayonı iqtisadıy körçekkä terälgän. Rayon üzägendäge salımnarnı iñ küp tüläwçe şirkätlärneñ küpçelege yabılıp betkän yäki yabılu aldında. Alardağı yözlärçä keşe eşsez qalğan. Çittän kilgän kördlärgä östenleklär birü, ä urındağı xezmät keşelären ikençe planğa küçerü rayon xalqınıñ soñğı sabırlığın cuydırğan häm alar xaqimiätlärgä üz däğwaların belderü öçen miting oyıştırırğa bulğan. Uram cıyınında qatnaşuçılar rayon xaqime Rinat Ğäripovnıñ wazıyfasınnan kitüen taläp itä. Rayon Eçke eşlär bülegeneñ barlıq militsiä xezmätkärläre, cämğıse yözdän artıq keşe dä miting bulğan cirgä kiterelä. Rayon xaqimen eşennän kitärgä taläp itep cıyılğan mondıy kümäk cıyınnıñ älegä qädär respublikta bulğanı yuq ide. Meñnän artıq keşe cıyılğan mäydanğa rayon xaqime çıqmıy buldıra almıy, älbättä. Xalıq şigärlär totıp häm qıçqırıp xaqimneñ uramğa çığuın taläp itkäç, anıñ çıqmıy xäle yuq. Ämma uramda cıyıluçılarnı rayon başlığı söylägän süzlär qänägätländermi. Alar Ğäripovnı eşennän alu öçen köräşne däwam itäçägen belderä. Mitingnı oyıştıruçılarnıñ berse kümäk xucalıq räise Fähim Qorbanov söyli. (audio)

Kuşnarenkodağı mitingnıñ qaytawazı tiz arada Ufağa kilep citkäç, rayonğa ikençe könne ük Başqortstan prezidentı xaqimiäte başlığı Radiy Xäbirov kilep citä. Ul rayon citäkçelege belän dä, mitingnı oyıştırğan liderlar belän dä oçraşıp söyläşä. Läkin, Radiy Xäbirov kitkäç tä, rayonda mitingta qatnaşqan qayber keşelärne ezärlekläw, alarnı militsiägä çaqırtular başlana. Şulay itep Kuşnarenko rayonında xalıq belän xaqimiätlär arasındağı qarşılıq haman da kisken xäldä. Aldağı könnärdä ni bulıp betär?

XS
SM
MD
LG