Accessibility links

дүшәмбе, 5 декабрь 2016, Казан вакыты 07:34

Tatnet: forumçılar V.Putin täqdimnärenä mönäsäbät belderä




Rusiäneñ ictimaği-säyäsi tormışında bulğan xällär internet säxifälärdä, bik tiz arada çağılış taba. Mäsälän, tatforum.at.tt digän adresta urnaşqan saytta Rusiä Prezidentınıñ soñğı täqdimnären tikşerü bik aktiv töstä bardı. «Putin saylawlarnı beterde» dip yazıp çıqtı ber forumçı. «Respublika Prezidentın başqa saylamıybız, annan inde tatar telenä dä çirat citär, latin grafikası turında äytäse dä yuq», dip fikerläre belän büleşte ikençe forumçı. Tağın, Tatarstan Prezidentınıñ bu qararğa pozitsiäse döres buldımı, yuqmı dip fiker alıştı alar. Qaysıberläre «Şäymiev nigä saylaw beterelüne xupladı ikän», dip ğäcäplänsä, ikençelär, «anıñ başqa çarası yuq ide», dip aqlarğa tırıştılar. «Ni säbäple, Rusiä töbäge citäkçesen xalıq tarafınnan saylatmawğa qarşılıq kürsätüçelär kürenmäde ikän», dip baş watuçılar oçrıy. Şunduq, Mäskäwdä demokrat firqälär ütkärgän qarşılıq çarası turında mäğlümat tä urnaştırılğan. Alar arasında «Watan» firqäse wäkilläre dä bulğan ikän. Bu xäbärgä qarata tatforum.at.tt säxifäsendä yazuçılar qänäğätlek xislären belderde. Şuşında uq, Möxämmät Minaçev häm Fäüzä Bäyrämova imzalağan möräcäğät urnaştırılğan. Anda respublikalarda Prezidentlar saylawnı beterügä qarata qarşılıq belderelä. Şul uq möräcäğät, mtss.ru adresında Mäskäw tatar studentları saytında elengän, ämma anda möräcäğät xaqında da, anıñ eçtälege turında da fiker alışuçı bulmadı.



Ütkän atnada Zäynäp häm Zölfätneñ saytları açılırğa tora digän idek. Bu atnada ul eşli başladı. Ämma xäzer dä sayt, eşlänep citmägän, dip äytep bula. Berençe bittä yazılğança, saytnıñ nindi bulaçağı xaqında xucalarnıñ tögäl fikerläre yuq. Alar, saytnı yasawda internetta yörüçe häm cırçılarnıñ icatın yaratuçı härkemne qatnaşırğa çaqıra. İñ qızıqlı täqdim yasawçığa artistlarnıñ soñğı cır cıyıntığı büläk itep bireläçäk. www.zaynapzufar.ru saytında qayber säxifälär buş, mäsälän, «afişa», «fotoräsemnär», «cırlar» kebek büleklär eşlämi. Anıñ qarawı, «fiker» digän bülek eşli, häm anda, başqa büleklärdän ayırmalı bularaq, qatnaşuçılar küp. Şulay itep, Zäynäp häm Zöfärneñ saytı açıla digän xäbärne işetep, cırçılarnıñ tanışları sayt açılu belän qotlağan, Finländiädäge cırçı Cämilä qotlawların da kürep bula, Zäynäp belän Zöfärneñ canatarları da, cırçılar belän şoklanuın belderä. Başqa keşelär, saytığızda kübräk mäğlümat bulsın ide, cır tekstları da, räsemnär, tormış yulı turında tärcemäi xälne dä kürergä telär idek, dip yazıp qaldırğan. Üzegez saytnı kürergä teläsägez, adresın qabatlıym: www.zaynapzufar.ru

Bikä Timerova.

XS
SM
MD
LG