14 yılğa suzılğan tänäfestän soñ bügen Ğiraq hawa yulları üz eşen başladı. Başta suğış, annan soñ Saddam Xösäin xökümätenä bilgelängän sanksiälär arqasında Ğiraqnıñ üz hawa şirkäte eşlämäde. Bügen Jordaniä başqalası Ammannan Bağdadqa 737nçe Boeing oçtı, kire Ammanğa oçqıç bügen ük äylänep qayta. Hawa yulları şirkäte matbuğat wäkile Raad Ağabi süzlärenä qarağanda, älegä oçqıçlar Bağdadtan kön sayın Amman häm Süriä başqalası Damaskka oçaçaq, soñıraq Berläşkän Ğaräp Ämirleklärenä oçışlar başlanaçaq.
