Accessibility links

Кайнар хәбәр

Qarzai: Xalıqara köçlär Äfğanstanda kiräk qadär qalaçaq


Äfğanstan eçke eşlär ministrı Ali Ahmad Jalali, kiläse ayda ütäçäk prezident saylawlarına qadär ildä terror höcümnäre bulırğa mömkin, dip belderde. Berläşkän Millätlär Oyışması iminlek şurası dönya illärenä Äfğanstanda saylawlarğa iminlekne tä''min itergä yardäm kürsätergä çaqırdı.

Bügen Äfğanstannıñ waqıtlı prezidentı Hamid Qarzai saylawaldı eşçänlegen däwam itte. İke kön elek Gardez şähärendä oçraşular waqıtında Qarzai''ğa höcüm itelgän ide. Bügen Qabulda, xalıqara xärbi köçlär Äfğanstanda tağın küpme waqıtqa qalaçaq digän sorawğa, Qarzai – kiräk qadär qalaçaq, dip cawap birde: (audio)"Xalıqara köçlär monda waqıtlıça ğına. Ämma alar bezneñ üteneç belän äle dä qala. Bez alarğa kön dä monıñ öçen räxmät äytäbez. Üzebez köçle ğaskär tuplağaç – alar kitäçäk," dide Qarzai. Xäzer ildä Amerika Quşma Ştatları citäkçelegendä – 17 meñ tiräse häm NATO qaramağında 8 meñgä yaqın xärbi bar. 9nçe üktäbrdä ütäçäk prezident saylawları aldınnan ildä iminlek şatrları naçar. Wazğiätneñ qurqınıç bulğanına – päceşämbe könne Gardez şähärendä prezidentqa bulğan höcüm dä ber dälil bulıp tora. Höcümneñ ikençe könendä Quşma Ştatlarnıñ Äfğanstandağı ilçese Zalmay Xalilzad borçılu beldergän ide. Bügen ilneñ eçke eşlär ministrı Ali Ahmad Jalali, Taliban häm Al-Qaida suğışçılarınıñ äfğan-paqstan çigendä höcümnär äzerläwe turında mäğlümat bar, dide. BMO iminlek şurası NATO ğaskärläreneñ Äfğanstanda qalu möddäten tağın ber yılğa, 2005neñ üktäbr ayına qadär ozaytu turında soradı. Uzğan yılda ildäge bäreleşlärdä meñnän artıq keşe hälak buldı. May ayınnan alıp avgustqa qadär ildä saylawlarğa äzerlek alıp barğan 12 keşe üterelde. Köç qullanunıñ däwam itüe saylawlar uzdırunı da şik astına quya. Uzğan atnada Qarzai ilneñ könbatışındağı Herat şähäre başlığı İsmail Xannı wazifasınnan alğannan birle bu töbäktä wazğiät kiskennäşte. Qarzai, İsmail Xannıñ xökümättä urın alaçağına ömet belderde: (audio) "İsmail Xan näticäle eşe öçen yuğarıraq, ministr wazifasına kütärelde. Häm Äfğan xalqı mine qabat prezident itep saylağan oçraqta, min anıñ kiläçäktä dä xökümättä urın aluın telim," dide Qarzai. Xäzerge prezident şulay uq, ägär Äfğanstan üzenä torıqlı kiläçäk teli ikän – ilne qoralsızlandıru häm xakimiätne üzäkläşterü kiräk, dip östäde.

Alsu Qormaş
XS
SM
MD
LG