Accessibility links

чәршәмбе, 7 декабрь 2016, Казан вакыты 13:33

«Nurulla» mäçete tiräsendäge nizağ yaña borılış aldı


Şuşı könnärdä «Nurulla» mäçete tiräsendä kilep tuğan xäl, yaña borılış aldı. Şuña, bez bu temağa yañadan äylänep qaytırğa buldıq.

Belgänegezçä, süz Qazannıñ Kirov uramında urnaşqan ber bina öçen, ber yaqtan Nurulla mäçete, ikençe yaqtan «FON» tözeleş şirkäte arasında barğan nizağ turında bara. Bu mäs’älädä, «Nurulla» mäçeten Milli mäcles wäkilläre yaqlıy. Alar qatnaşlığında, Däwlät Şurası utırışı bulğan könne, parlament binası yanında qarşılıq çarası ütte. Annan soñ, älege nizağ Däwlät Şurasınıñ utırışında da iğtibar üzägendä buldı. Bu xaqta Tatarstan Prezidentı ta, Prokuratura wäkilläre dä, Qazan şähär idäräse wäkilläre üz süzlären äytte. Tatarstan Prezidentı bu mäs’äläne tikşerergä boyırıq birgän ide. Annan soñ närsä üzgärde?

Bu sorawı Milli mäcles räise urınbasarı Zöhrä Aysinağa birdek. Ul bolay cawap birde : «..14 sentäberdä, Cir häm milek ministrlığı «Turan» häm «Fon» arasındağı kileşü qanunsız digän däğwä belän Arbitraj mäxkämäğä möräcäğät itte...» .

«Azatlıq» radiosı bu eşneñ barışı xaqında daimi söyläp bara, şuña bezneñ tıñlawçılarıbız beläder. Tartqalaş barğan bina başta «Turan» fondına birelgän bulğan. Yıllar buyı bina qarawçısız torıp, işelep barğanğa kürä, aña yaña xuca ezli başlağannar. Tözeleş şirkäte, älege binanı elekke xucadan satıp aldıq, dip kilä. «Nurulla» mäçete, bu binanı bezgä Millek ministrlığı tapşırdı, dip üz döreslegen dawlıy. İke yaq ta, üz dokumentların kiterä. Xäzer qaysı oyışma qanun bozğan, qaysı yaq xaqlı ikänen mäxkämä xäl itärgä tieş. Ämma, bu xoquq oyışması qararınnan soñ da, cawapsız sorawlar qala birä. Xäzer milek ministrlığı täqdime belän, älege mäs’älä Arbitraj mäxkämädä yañadan qaralaçaq. Bu xaqta tözeleş şirkäteneñ xoquq belgeçläre belä. «Fon» şirkäteneñ xoquq idäräse başlığı Latıypov İlşat bu turında bolay belderde:

«Bu eş 2004 yılnıñ avgust ayında mäxkämädä qaraldı inde. Ul waqıtta, bezneñ şirkät häm binanıñ elekke xucası arasındağı kileşü xoquqlı digän qarar çığarıldı. Şuña bez, ministrlıqnıñ däğwäsın qanunsız, dip sanıybız..»

Nizağta qatnaşqan ike yaq ta, bina tiräsendä ber nindi eş alıp barılmıy, dip raslıy. Çönki Arbitraj mäxkämäneñ başqa qararı belän, binanı sütü tıyılğan. «Fon» şirkäte wäkilläre, monıñ belän kileşmiçä, şikäyät yazarğa isäpli. Şirkät mäçetkä terälep torğan binanı cimerep, anıñ urınında ofislar üzägen tözergä telägän. Milli mäcles räise urınbasarı Zöhrä Aysina älege binanıñ proyektın ezläp tapqan. Anı elekke xuca «Turan» fondı arxitektor Latıypovqa zakaz birep eşlätkän. Süz 32 metr bieklegendäge, mäçetne qaplıy torğan qorılma turında bara. Milli mäcles räise urınbasarı Zöhrä Aysina fikerençä, tözeleş mäçetne cimerügä kiterergä mömkin.

Bikä Timerova.

XS
SM
MD
LG