Accessibility links

пәнҗешәмбе, 8 декабрь 2016, Казан вакыты 17:26

BMOnıñ yıllıq utırışında Kofi Annan dönya illäre citäkçelären qanunnarnı ütärgä çaqırdı


Bügen dönya illäre citäkçeläre Berläşkän Millätlär Oyışmasınıñ yıllıq utırışına cıyıldı. General Assambleyanıñ 59nçı sessiäse köntärtibendä berençe çiratta Ğiraq mäs'äläse tora. Monnan tış Sudannıñ könbatışındağı Darfur – andağı wazğiät häm ğömüm dönyadağı şartlar turında da süz baraçaq. Berläşkän Millätlär Oyışması General' sekretare Kofi Annan, cıyınnı açqanda dönya citäkçelärenä möräcäğät itep, "qanunnarnı oyatsız räweştä sanğa suqmawnı" tuqtatırğa çaqırdı. "Qanun xakimiäten urnaştırırğa teläwçelär, başta üz illärendä qanunnarnı ütärgä tieş", dip Annan Beslandağı qan qoyunı, Ğiraqtağı soñğı totıq alularnı, iskä aldı. (audio) "Ğiraqta tınıç xalıqnı yuq itü däwam itä. Humanitar oyışmalar wäkilläre, jurnalistlar häm suğışta qatnaşmağan başqalarnı totıq itep alalar häm waxşilärçä üterälär. Şul uq waqıtta Ğiraq totqınnarı ezärleklänä," dide Kofi Annan. Ämma terrorğa qarşı köräş irekleklärne çiklärgä tieş tügel, dip däwam itte BMO general sekretare. Uzğan atnada Kofi Annan Quşma Ştatlarnıñ Ğiraqta alıp barğan suğışın qanunsız dip atağan ide. BMO İminlek Şurası ozaqqa suzılğan nizaqlarnı, bigärk tä Yaqın Könçığış häm Ğiraqtağı xälne çişü yulın täqdim itä, dide Annan. BMO General' sekretare dönya illäre citäkçelären tınıç xalıqnı saqlaw häm qoralsızlanu turında kileşügä qul quyarğa çaqırdı. Utırışta şulay uq AQŞ prezidentı George Bush çığış yasadı.

XS
SM
MD
LG