Accessibility links

якшәмбе, 11 декабрь 2016, Казан вакыты 10:56

Qazaqstannıñ Semi şähärendä Räşit Wahapov istälegenä bağışlanğan V xalıqara tatar sänğäte festivale ütte


14-18 sintäber könnärendä Qazaqstannıñ Semi şähärendä söyekle cırçıbız Räşit Wahapov istälegenä häm Qazaqstanda Rusiä yılına bağışlanğan V xalıqara tatar sänğäte festivale bulıp uzdı. Anıñ töp oyıştıruçıları Semi şähäreneñ tatar sänğäte mäktäbe häm tatar mädäniät üzäge buldı. Cirle xakimiätneñ yärdäme dä sizerlek ide : şähär üzägendäge mähabät bina - “Forsaj” isemle mädäniät sarayı 5 kön buyına tüläwsez tatarlar qaramağına birelde, festival'' ütkärüdä totılğan çığımnarnıñ dürttän ber öleşen aqimat kütärde. Başqa çığımnar iğanäçelär isäbennän buldı .

Festival'' ğädättägeçä 4 nominatsiädä ütte. Qatnaşuçılar näfis süzdä, cırda, biyudä, häm törle muzıka qorallarında uynawda köç sınadılar. Alarnıñ yäşe dä çiklänmägän ide. Konkursta 3 yäşlek nänilär dä, 80-gä citkän ölkännär dä qatnaştı. Tatar sänğäte mäktäbe direktorı häm tatar mädäniät üzäge räise Gabdulxak äfände Axunjanov tatar sänğäteneñ kiläçäge balalar qulında dip sanıy. Sänğat mäktäbenä ul 3-4 yäşlek nänilärne dä cälep itkän , alar belän “Görläwek” ansamble tözegän. Gabdulxak äfändeneñ öyränçekläre 3 yäşlek Al''bina Gabitovanıñ tırışıp-tırışıp “Kerpe” cırın başqaruına, rus millätennän bulğan 4 yäşlek Varvara Semenovanıñ moñlı itep “Zöläixä” ne suzuına soqlanmağan keşe qalmağandır.

Töp maqsatı - mömkin bulğança kübräk keşene tatar sänğätenä cälep itü häm yaña talantlar açu bulğan bu cır bäygese çın mäğnäsendä üzeneñ moradına ireşte disäk yalğış bulmas. Ğomum qatnaşuçılarnıñ sanı bu festival''dä 500 gä yaqın buldı. Şunsı da iğtibarğa layık, qatnaşuçılar anda tatar millätennän kenä tügel, nemes, qazax häm rus millätlärennän dä buldılar. Ayıruça vokal nomenatsiäsendä. Pedagogiä institutınıñ xorı, sänğät häm pedagogiä kolliätläre kollektivları “Sarman”, “Şäl bäylädem”, “Ay bılbılım”, “Ziläylük” kebek xalıq cırların üzlärenä ber ostalıq belän başqardılar. Xor häm ansambl’lär arasında berençe urınnı pedagogiä institutı xorı yauladı.

Festival''neñ tağı ber maqsatı - borıñğı cırlarnı tergezü, alarnı xalıqqa citkerü ide. Bu maqsat ta tormışqa aştı kebek. Härber qatnaşuçı Räşit Vahapov repertuarınnan ber cır häm ber ozın köy başqardı. Şunsı da quanıçlı, ölkännär dä, yäşlär dä tıñlawçığa tatar xalıq cırlarınıñ neçkäleklären citkerä aldılar. 17 yäştän 35 yäşkäçä bulğan nominatsiädä xalıq cırın başqaruda Çuwaşstan yegete İldus Şäydullinğa tiñnär bulmadı. Festival''neñ gran-prie dä aña xalqıbıznıñ “Täftiläw” cırın moñlı , matur itep başqarğanı öçen birelde.

Festival''dä yäş talantlar da açıldı. Tomskidan Näzirä Männäfovanıñ, Tübän Qamadan Marat Fäyruşinnıñ häm Ayrat İbrahimovnıñ, Semeydan Qamilä Nurbekovanıñ, Älfiä İsxakovanıñ häm Aqmaral Akıynovanıñ, Ust''-Kaminnan Dilärä İşmuratovanıñ, Novosibirskidan Älmirä Mirgayazovanıñ, Astanadan Radion Quzyäyewnıñ häm tağın küp kenä başqaruçılarnıñ çığışları jyuri tarafınnan yuğarı bäyälände. Här nominatsiädä dä ciñüçelär bilgelände, alarğa diplomnar häm büläklär birelde. Äytergä kiräk, iganaçelär yärdäme belän yunätelgän büläklär şaqtıy qimmätle ide. Gran-pri büläge - sanaq buldı. Berençe, ikençe häm öçençe urınnarnı yaulawçılarğa törle markalı fotoapparatlar, ciñel maşina suıtqıçları häm başqa törle qimmätle büläklär birelde. 7 yäştän 11 yäşkäçä bulğan nomenatsiädä ciñüçelärgä qayrı tunnar büläk itelde.

Festival''neñ qayber lawreatlarına Tatarstan mädäniät ministrlığınıñ büläkläre dä tapşırıldı. Aña Gabdulxak äfände Axuncanov citäklägän Semey tatar üzägeneñ ölkännär ansamble “İstälek” häm Qamilä xanım İsmailova citäklägän ölkä balet mäktäbeneñ biyu törkeme layıq buldı. Yarışlarda berençe urınnı aluçılarnı Bötendönya tatar kongressı isemennän dä büläklädelär. Alarğa Räşit Wahapovnıñ icatı turındağı al''bom, anıñ cırları yazılğan disklar häm kassetalar birelde.

Festival'' barışında törle töbäklärdän kilgän qatnaşuçılar öçen törle oçraşular, aralaşular da qaralğan ide. Tatarstannan, Çuaşstannan, Seber yağınnan – Omski, Tomski, Novosibirski şähärlärennän kilgän qunaqlarnı qazax xalqınıñ böyek şäxese Abay häyqale yanına alıp bardılar, köndezge häm kiçke şähär, istälekle urınnar belän tanıştırdılar. Programmada Qazaxstan xalıqları assambleyasında bulu da qaralğan ide. Anda assambleya citäkçelege häm tatar üzäge aktivistları belän oçraşu buldı. Bu çaralar älbättä festival''dä qatnaşuçılar arasında cılı möğamälälär urnaşuğa yärdäm itmi qalmadı. Anda 5 kön buyına duslıq, tuğanlıq, berdämlek xisläre xökem sörde.

Saniä Mirxaleeva, Omski

XS
SM
MD
LG