Accessibility links

якшәмбе, 11 декабрь 2016, Казан вакыты 05:09

"Qazan utları" jurnalınıñ 9 sanı turında şağirä Näcibä Safina söyli


“Qazan utları” jurnalınıñ 9 sanı tışlığınıñ berençe bitendä Qazan şähäreneñ Arakçino bistäsendäge kürenekle rässam İldar Xanov citäkçelegendä tözelgän törle dini konfessiälärne berläştergän ruxi-däwalaw üzägeneñ fotosuräte urın alğan. Näcibä xanım , ä jurnalnıñ eçtälege närsäse belän uquçını üzenä cälep itä soñ?“Qazan utları ”jurnalı baş möxärrire, şağir Rawil Fäyzullinnıñ “Ğibrätlär alırlıq ütkän yul” dip atalğan yazması birelgän. Bu yazmada Tatarstan yazuçılar berlegeneñ 70 yıllıq yubileyına bağışlap, avtor tarafınnan qayber küzätülär, xatirä –uylanuları birelgän.( sitata) “Uylanırlıq säbäplär bar. Yazuçılar berlege- ictimaği oyışma. Ä älegä andıy oyışmalarnıñ yäşäyeşen bilgeläwçe qanun yuq. Dimäk , yuridik xäyät- bar belän yuq arasında. Bügenge köndä yazuçı xezmäten sotsial' yaqtan garantiälägän zakonnar yuq. ( şuña kürä dä Rossiädä bik küp yazuçılar fäqirlek däräcäsendä.....Ägär Respublika bulmasa, borınğıdan däwlät totqan xisne yörtkän zatlı qatlam bulmasa , eşlär bik möşkelgä äyläner ide. Xäyer, ğomumän nigä möşkel bulırğa tieş di äle. Talantlı bulu faciğä bulırğa tieşleme?(sitata tämam). Şağirneñ bu sorawına jurnal bitendä üzeneñ şiğere belän ikençe şağir Marsel' Ğäliev cawap birä tügelme digän uy mine tetränderde di Näcibä Safina. Şiğer “Yola”dip atala. Häm bu yola menä niçek bulğan: Bolğar cämğiätendä bik tä aqıllı keşe üsep citsä, “Bu –bezgä artıq. Bu – Täñregä kiräk!” dip anı tege dönyağa ozatqannar digän fiker äytä Marsel' Ğäliev şiğereneñ başında. Jurnalda Çallıdan Firüzä Camaletdinova, Ufadan Näcibä Ämineva şiğerläre dä iğtibarğa layıq. Ämma min tatar p'yesaları bäygesendä 2 urınğa layıq bulğan Rabit Batullanıñ “Cimerelgän bäxet” dip atalğan äsäre turında süz äytergä telim. Bu äsärdä dä yazuçı yazmışı häm kisätü: saq bulığız, sezneñ härberegez belän şulay buluı ixtimal. P'yesa, quyıludan bigräk, räxät uqıla. Äyterseñ lä, bu uqu öçen yazılğan drama äsäre. Jurnalda şulay uq Nurixan Fättäxnıñ tormış iptäşe Respublikanıñ atqazanğan tabibı –Rufina Fättäxovanıñ “Ber äsärneñ basılu tarixı” isemle yazması şulay uq yazuçılar tormışına bağışlanğan. Bu yazmanı uqıp çıqqaç, yänä ber qat Marsel' Ğäliev äytkän Yola zäxmäte tügelme ikän, dip uylanıp quyasıñ. Baqsañ, Nurixan ağa Fättäxnıñ Tuqay bülägenä layıq bulğan äsäre xalıqqa barıp citmäskä tieş bulğan ikän. Şundıy kirtälärne cimerä alğan yazuçıları bulğanğa ädäbiätebez böyek. Şuña kürä xalqıbız yazuçığa xaq süz iäse itep qarıy. Süzemne yomğaqlap şunı äytäm, jurnalnıñ aldağı sannarında basılıp barğan Adler Timerğalinnıñ ”Milliät süzlege” törki dönyabızğa iskitkeç baylıq çığanağı ul. Kiläçäktä bu süzlekne ayırım kitap bulıp çığuına ömetem zur”, - dide Näcibä Safina “Qazan utları” jurnalınıñ 9 sanına küzätü yasağanda.

Mälikä Basıyr.

XS
SM
MD
LG