Accessibility links

шимбә, 10 декабрь 2016, Казан вакыты 04:17

Qazaxstan oppozisiäse parlament saylawları näticäse belän qanäğät tügel


Qazaxstannıñ oppozisiädäge Aq Jol partiäse yäkşämbe parlamentqa uzğan saylawlar näticäsen – "tupas falsifikasiä" dip atadı. 77 keşelek parlamentta ber genä Aq Jol wäkile bulaçaq. Firqa räistäşläreneñ berse, Bolat Abilov süzlärenä qarağanda, alar saylawlarda tawışlarnıñ 40 yä 50%tın cıyarğa tieş ide. Partiäneñ Astanadağı citäkçese Qali-Axmet Bimaxanov, xärämläşülär, firqa başlığı Altınbek Sarsenbayevnıñ parlamentta urın almawı öçen eşlände, dide. (audio) "Bez qanäğät dip äytä almıym. Bu – ğadelsezlekneñ ber misalı. Aldan yasalğan küzätülärgä qarağanda bez parlamentta kimendä 2 urın alırğa tieş idek. Bolarnı barısın da räsmilär – Altınbek Sarsenbayev parlamentqa ütmäsen öçen eşläde, min moña ışanam," dide Aq Jol firqase citäkçeläreneñ berse. Bügen Üzäk Saylaw Komissiäse räise Zagipa Baliyeva parlament saylawları näticäsen iğlan itte. Prezident yaqlı Otan (yağni watan) partiäse 60%tan artıq, oppozisiädäge Aq Jol – 12%, prezident yaqlı tağın ber partiä – Asar – 11% häm Eşçelärneñ agrar-sänäğät berlege – 7% tawış alğan.

XS
SM
MD
LG