Accessibility links

шимбә, 10 декабрь 2016, Казан вакыты 17:43

Lavrov terrorğa qarsı köräş qısalarında säyäsi qaçqınnar xoquqın çiklärgä çaqırdı


Russiäneñ tışqı eşlär ministere Lavrov BMOsı Ğomumi Ciılışında yasağan çığışında, xalıqara iminlek strukturasın reformalarğa, anti-terror köräşne nığıtırğa çaqırdı. Russiä qaçqınnar statutınnan faydalanıp terrornı yaqlauçılarnı üz illärenä tizeräk tapşırunı küz aldında totqan İminlek Şurasınıñ rezolutsiä proyektın tarattı. Britaniä säyäsi qaçqınnar xoquqı mäsäläsendä Russiä belän qayber fiker ayırmalıqları bulsa da monı yaqla çıqtı.

Russiä säyäsi qaçqınar xoquqı mäsäläsendä Könbatış belän bulğan bäxäsen Ğomumi Ciılışta kütärep çıqtı häm terror mäsäläsendä ike törle standartnı beterergä çaqırdı. Könbatış räsmiläre Russiäneñ Çeçnä säyäsätenä borçıluların häm konfliktnı politik yullar belän xäl qılırğa kiräklegen belderälär. Britaniä belän AQŞ Russiä tarafınan terrorist dip tamğalanğan Aslan Masxadovnıñ kiñäşçelärenä säyäsi qaçqınnar xoquqı birde. Russiä tışqı eşlär ministere Sergey Lavrov Ğomumi Ciılışta yasağan çığışında xökümäteneñ moña qarşı buluın belderep, bu dönya külämendä anti-terror tırışlığına zian kiterä dip äytte.

Audio

"Terrorçılarğa, alarnı yaqlauçılarğa sıyınu urnı birü, anti-terror frontına qatnaşuçılarnıñ berdämlegen häm üzara ışanıçın qaqşata , terroristlarnıñ eşçänlegen aqlıy häm başqa illärdä dä şundıy uq cinayät eşlärgä qıulandıra."

Lavrov şulay uq, Russiä prezidentı Putinneñ politik xakimiätne Kreml qulında tuplau plannarına Könbatışnı borçıluın küz aldında totıp bulsa kiräk, Russiäneñ iminlegen saqlarğa xaqı bar dip belderde.

Audio

"Bez dävlätebezneñ suverenlığına qul suzuğa yul quymayaçaqbız. Terrorğa qarşı toru, vatandaşlarıbıznıñ ireklektä häm demokratiädä imin häm igelekle yäşäven garantiäläv öçen ilneñ häm xalıqnıñ berdämlegen nığıtaçaqbız."

Russiä tarafınan taratılğan İminlek Şurası rezolutisä proyektında säyäsi qaçqınnar xoquqı statutınnan yauızlanıp terror aktların oyştırğan yaki finansiälägän şäxeslärne tizlek belän tapşıru ğına tügel, ä BMOnıñ terrorda qatnaşqan törkemnärneñ qara isemlegen äzerläve dä täqdim itelgän. Andıylarnıñ mal-mölkäte tudırılırğa , qoral embargosı quyılırğa häm alar extraditsiälänergä tieşlär. Britaniä belän Russiä arasında Masxadovnıñ väkile Axmed Zakayevqa Britaniädä säyäsi qaçqınnar xoquqınıñ birelüe säbäple bäxäs çıqqan ide. Moña qaramastan, Britaniäneñ tışqı eşlär ministere Jack Straw Lavrovtan soñ yasağan çığışında Russiäneñ bu inisiativasın yaqlap çıqtı.

Audio

"Böyek Britaniä terrornı yaqlağan häm finansiälägän şäxeslärneñ säyäsi qaçqınnar statutınnan faydalanmauların buldıru mäsäläsendäge Russiä täqdim itkän İminlek Şurası rezolutisä proyektı turında Russiä Federatsiäse belän bergä eşliäçäk. Bez şulay uq andıy şäxslärne ekstraditsiälävne tizlätü mäsäläsendä dä Russiä Federatsiäse häm İminlek Şurasındağı başqa partnerlar belän dä xezmättäşlek itäçäkbez."

İminlek Şurası komitetı älegä Al Qaida häm Taliban belän bäyläneşe bulğan keşelär häm oyışmalarnıñ isemlegen genä äzerli. Alanıñ mal-mölkäten tuñdırırğa, säyäxät itülärenä häm qoral satıp alularına yul quymasqa tırışa.

Färit İdelle, Praga.
XS
SM
MD
LG