Accessibility links

Кайнар хәбәр

Supermarketta kibet saqçıları yaulıqtan yörüçe ike möselman qızın totqarlağannar


Soñğı yıllarda Tatarstanda yaulıq bäyläwçe möselman qızlarınıñ sanı arta barğanın küzätergä mömkin. Berençe waqıtlarda bu kübesen ğäcäpländerä ide. Uramda barğanda, avtobuslarda xicaptan bulğan qızlarğa törle kimsetä torğan süzlär äytkäläsälär dä, berniçä yıldan bu küreneşkä xalıq iäläşte, ällä ni iğtibar itmi başladı. Läkin soñğı waqiğalar bu mäs’äläne qabat qatlawlandırdı. Häm monıñ şawqımı Tatarstanda da açıq sizelä başladı. Yämaşeva uramında urnaşqan supermarketta xicaptan bulğan ike möselman qızın totqarlağannar digän xäbär küp kenä respublika möselmannarın qurquğa saldı. Totqarlanğan Güzäl belän Gölnaz ikese dä studentlar, Qazan däwlät universitetında belem alalar. Mondıy xälgä alar berençe tapqır oçrağannar häm “Azatlıq” radiosına Gölnaz bolay dip söyläde.

Bezne “Razdol'ye” supermarketında kibet saqçıları totqarladılar häm arttağı bülmägä alıp kerep kittelär, bezneñ sumkalarıbıznı, dokumentlarıybıyznı tikşerdelär. Säbäben sorağaç, kibettä ozaq yörgän öçen dip añlattılar. Läkin bez başqa keşelär kebek ük yördek. Annan bezne militsiäğa alıp kittelär, anda tikşergännän soñ bernindi ğayıbebez bulmağannı añlağaç bezne cibärdelär.

Şulay itep ni öçen totqarlawların sorağaç, qızlarğa kibettä ozaq yörgängä dip axmaq cawap birgännär, barı annarı ğına şäxid qızlarğa oşağan öçen dip tä östägännär. Xäzer qızlar üzlären şulay kimsetkännär öçen Keşe xoquqların yaqlaw oyışmalarına möräcäğät itärgä cıyınuları turında äyttelär.

Mondıy xäldän soñ, xäzer yaulıqtan bulğan här xatın-qız kisken tikşerü astında bulaçaq dip añlarğa mömkin. Şariğat quşqança yäşärgä batırçılığı citkän qızlarnıñ berkemgä zıyanı timäsä dä, säyäsi wäzğıät alarnıñ yäşäw räweşen şaqtıy qısrıqlıy. Häm respublikadağı “İxlas” ictimaği oyışması citäkçese Rişat Xämidullin xicaptan yörgän qızlarğa qurqınıç yanawı däwam itäçägen bilgeläp uzdı. “Azatlıq” radiosına ul bolay dip belderde

Soñğı waqıtta massaküläm mäğlümat çaralarında şaxid qızlar turında söyli başladılar. Xäzer törle uqu yortlarında, keşe küp bulğan urınnarda ezli başladılar alarnı. Bu säyäsät däwam itäçäk. Ägär xökümät qarşı çıqsa monı bälki tuqtatıp ta bulır, ämma älegä bez Mäskäwgä buysınabız. Häm yaulıqlı qızlarğa kiçen uramda yörergä qurqınıç bula bara.

Äytergä kiräk, bolay da törle mısqıllı qaraşlar, kimsetüle süzlär işetergä mäcbür bulğan möselman qızlarınıñ xäle tağın da awıraya. Xäzer xicaptan bulğan xatın-qız belän ber oçqıçqa yäki başqa tör transportqa da utırırğa da qurquları xaqında äytä xalıq. Tatarstanda da xällär qatlawlana. “İxlas” oyışması citäkçese Rişat Xämidullin süzen däwam itep bolay di

Tatarstanda möselman dinenä häm başqa konfessiälärgä bu köngä qadar tolerant qaraş ide. Ämma MVD belän FSB redkollegiä uzdırğaç xällär üzgärde. Şul uq kiçne militsiä büleklärendä möselman qızları häm kavkaz xalıqları arttı. Bu nindider östän quşılğan planğa oşıy. Häm östän quşılğaç alar monı üti almıy qala almıylar.

Äytergä kiräk, xäzer Mäskäwdä qara kiemnän yörgän xatın-qızlarğa da şiklänep qarıylar di. Ä yaulıqtan yörgän möselman qızları bu könnärdä qurquda.

Landış Xarrasova

XS
SM
MD
LG