Accessibility links

Кайнар хәбәр

Äfğanstandağı terrorçılar prezident saylawların özergä tırışa, dip kisätä Amerikan xärbiläre


Tağın 2 atnadan, 9 Üktäberdä, Äfğanstanda berençe prezident saylawları ütergä tieş. Amerikan xärbiläre äyütençä, soñğı waqıtta Taliban häm Äl-Qaidä suğışçıları bü saylawlarnı özü tırışlıqların arttıra. Şimbä könne Kabulda ütkän matbuğat oçraşuında amerikan generalı David Barno bolay dide:

Audio (David Barno)

"Täbäktäge bar teror oyışmaları öçen bu irekle saylawlarnı özü urtaq maqsat bulıp tora."

Barno süzlärençä, Äfğanstannıñ könyaq-könçığışında, Paktia, Xost, Wäziristan kebek tawlı töbäklärdä Äl-Qaidä suğışçıları bulsa, könayqtağı Uruzğan , Zabol, Helmand, Kandahar wilayätlärendä Taliban qaldıqları xäräkät itä. Uzğan töndä Äfğan räsmiläre Uruzğan wilayätendä bulğan bäreleşlärdä, Guantanamo törmäsendä utırıp qaytqan Talibannıñ däräcäle komandirı Mäwläwi Ğafar üterelgän dip xäbär itte. General Barno süzlärençä, terrorçılarnıñ saylawlarnı özü tırışlığın xalıqnıñ bik tar qatlamı xuplıy, küpçelege - saylawlarnı ütkärü yağında. Tawış birü waqıtında iminlek täemin itü öçen uzğan atnada Äfğanstanğa tağın ber meñ amerikan xärbie kiterelde. Xäzer alarnıñ sanı 19 meñgä citte, yıl başı belän çağıştırğanda 2 tapqır kübräk. Prezidentlıqqa 18 namzät däğwa itä, ämmä ciñüne xäzerge citäkçe Xämid Karzai yawlar dip kötelä. Anıñ töp köndäşe, elekke Mäğärif ministrı Yunıs Qanuni ildäge suğışçılarnı qoralsızlandırıp-taratu plannarına qarşı çıqtı:

Audio (Yunıs Qanuni)

"Bezneñ ike yulıbız bar: yä çit illärgä buysınıp, alar quşqannı eşlärgä, yä cihadnı ixtiram itep, bäysez räweştä üz kiläçägebezne üzebezgä saylarğa."

Qanuninıñ töp tarafdarı Saqlanu ministrı Möxämmät Qasim Fähim tora şul uq qaraşta tora. Başqa namzätlär, şul isäptän Äbdel Sattar Sirat, ildäge iminsezlek säbäple saylawlarnı kiçekterergä çaqıra:

Audio (Äbdel Sattar Sirat)

"Bezneñçä, xäzerge iminsez wazğiättä irekle häm ğädel saylawlar ütkärep bulmıy."

Sirat Äfğanstannıñ elekke patşası Zahir Şaxnı xuplıy. 2001 yılda Taliban bärep töşerelgännän soñ küplär, waqıtlı xökümät başına näq menä ul quyılır dip kötkän ide. Ämmä Bonnda ütkän konferensiädä waqıtlı prezident itep Quşma Ştatlar tarafınnan xuplanğan Xämid Karzai saylandı.

-Ali Gilmi
XS
SM
MD
LG