Accessibility links

чәршәмбе, 7 декабрь 2016, Казан вакыты 11:37

Tatarstannıñ Yuğarı mäxkämäsendä Jilka cinayätçel törkeme eşe qarala başladı


Düşämbe könne Tatarstannıñ Yuğarı mäxkämäsendä Jilka dip isemlängän oyışqan cinayätçel törkemneñ eşe qarala başladı. Älege törkemneñ eşen tikşerü 3 yıldan artıq bardı. Mäxkämägä tartılğan 16 keşe Tatarstanda ğına tügel, Perm, Orenbur, Ul’yan, Rostov ölkälärendä qılınğan 19 üterü, şulay uq talaw, keşe urlaw häm başqa cinayätlärdä ğäyeplänä, dip xäbär itä, Novosti mäğlümät agentlığı. 27 sentäber könne 150 keşedän älege eşne qarawçı 12 cämäğätçelek mäxkämäse wäkile saylandı. Qazannıñ ber bistäse iseme belän Jilka dip atalğan cinayätçel törkem östennän mäxkämä eşe berär yıl barır, dip farazlana.

Dönyadağı 1 milliardtan artıq möselman 27 sentäberdä Bötendönya möselmannar könen bilgeläp ütte. Tatarstanda da islam dinen totuçılar şaqtıy bulsa da, älege datanı respublikada ällä ni zurlap bäyräm itmädelär. Bu bäyräm xaqında mäğlümät tä Qazanda näşer itelä torğan barı tik ber genä gäcittä dönya kürde. Respublikanıñ Diniä näzarätennän alğan mäğlümätlärgä qarağanda, maxsus älege kön uñayınnan zur çaralar – konferensiä, cıyılışlar uzdırılmağan. Barı tik añlatu, uqıtu eşläre genä oyıştırılğan, dip söyli İldus xäzrät Fäez. Xäyer, Bötendönya möselmannar könenä ük ölgermäsä dä, şuşı könnärdä Qazannıñ Bolğar mäçetendä İslam häm ğailä dip isemlängän söyläşü uzaçaq. Anda din belgeçläre, din ğalimnäre häm şulay uq pedagogika, psixologiä fäne belän şöğellänüçelär xäzerge ğailä problemaları, möselman ğailäse xaqında fiker alışaçaq.

27 sentäber könne Bötendönya möselmannarı bäyräm itsä, bu arada tatarstanlılar başqa eşlär belän mäşğül buldı. Respublikanıñ awıl xalqı közge qır eşläre, uñış cıyunı tämamlıy. Cıyılğan bäräñge, kişer, çögender şähär xalqına satıla da başladı inde. Uzğan yallarda Qazannıñ bar bazarlarında respublika rayonnarı citeşterüçeläre qatnaşlığında awıl xucalığı yärminkäläre başlanıp kitte. Anda şähär xalqı qışqa bäräñge, käbestä, kişer häm başqa yäşelçä satıp ala. Älege yärminkälärdä bäyälärneñ iñ arzan buluın isäptä totsañ, qazanlılarnıñ annan qapçıq-qapçıq äyber satıp aluı ğäcäp tügel. Başqalanıñ boralaq tözüçeläre isä bu aralarda üzläre yasağan yaña maşinanı täqdim itärgä cıyına. Mäskäwneñ boralaqlar şirkätendä uylanıp çığarılğan Mİ-38 boralağı Qazanda cıyıla. Ul säğätenä 290 km ütep, 6 meñ tonna yök kütärä ala.

Gölnaz İlgizär

XS
SM
MD
LG