Qazanda Xäter könenä äzerlek başlandı

Yıl sayın oktäber urtalarında 1552 yılda Qazannı basıp alğanda şähärne saqlap şähit kitkän ata-babalarıbıznı iskä alu yolası – Xäter köne uza. Anda tatar cämäğät eşlekleläre, milli häm ictimaği oyışmalar wäkilläre, ğomumän, milli canlı qazanlılar qatnaşa. Alay ğına tügel, Xäter könenä respublikanıñ başqa şähär rayonnarınnan, xätta kürşe respublikalarda da kilüçelär bar. Bıyıl da älege çarağa äzerlek eşläre inde başlanıp kitte.

Ğädättä Xäter könenä äzerlekne Bötendönya tatar ictimaği üzäge alıp bara ide. Bıyıl oyıştıru eşlären kemnär alıp bara soñ? 28 sentäber könne Azatlıq radiosınıñ Qazan studiäsenä yazuçı Zäki Zäynullin şaltırattı. Ul radiobıznıñ tıñlawçıların 15 oktäberdä ütkäreläçäk Xäter könenä çaqırdı. İskä alu çarası säğät 11 Qazannıñ İrek mäydanında başlanaçaq, dip äytte Zäki Zäynullin. Ul 18 sentäberdä uzğan Tatar ictimaği üzägeneñ plenumında al’ternativ oyışqan törkemneñ citäkçese bulıp tora.

Xäyer, tatar xalqınıñ tarixında uyılıp qalğan qayğılı könne iskä alu mäs’äläsendä milli xäräkättä qatnaşuçılar urtaq xislär häm plannar belän yäşi. Ä räsmi Bötentatar ictimaği üzäge citäkçese wazifaların älege waqıtta başqaruçı Räüf İbrahimovnıñ Xäter könenä äzerlek xaqında menä närsälär äytte.

Xäter könen ğädättägeçä Bötendönya tatar ictimaği üzäge äzerli. Bıyıl da bez ğädättägeçä millättäşlärebezne 15 oktäber könne İrek mäydanına çaqırabız. İskä alu çarası 10.30da başlanıp kitäçäk. Din ähellärebez sorawı buyınça, alarğa doğalar uqırğa waqıt kübräk bulsın öçen bez bu yulı irtäräk başlarğa buldıq. Qalğan öleş yıldağıça uzaçaq. Bez Puşkin, annarı Profsoyuznaya, Kreml’ uramnarınnan ütep, Söyembikä manarı yanına baraçaqbız. Anda keçkenä genä miting ütkärep, Qazannı yaqlap şähit bulğan ata-babalarıbızğa quyılaçaq häykäl yanına baraçaqbız

Räüf İbrahimov süzlärenä qarağanda, bu yulı Xäter könen oyıştıruda İctimaği üzäk belän bergälektä başqa milli oyışmalar da qatnaşaçaq. İctimaği üzäk belän bergälektä äzerlek eşlärendä Mäğärif assotsiatsiäse, Milli mäxällä Şurası, Milli mäcles, möselman xatın-qızlar oyışması, İdel-Ural assotsiatsiäse qatnaşaçaq.

Şul uq waqıtta, Rail İmamov häm tağın ber törkem millättäşlärebez Xäter könen 12 oktäberdä uzdırırğa cıyına. Alar Qazannı yawlap alğan kön 15 tügel, ä 12 oktäber, dip sanıy. Xäyer, Rail äfände Tatar ictimaği üzäge dä bıyılğı iskä alu çaraların näq menä şuşı köngä bilgelär, dip ömetlänä. Läkin räsmi Xäter köne 15 uzsa da, ul ber törkem iptäşläre belän şähit kitkän ata-babalarıbıznı 12 oktäberdä iskä alaçaq.

Gölnaz İlgizär