Accessibility links

сишәмбе, 6 декабрь 2016, Казан вакыты 05:55

İordan patşası Abdulla: "Ğiraq – saylawlar öçen qurqınıç urın"


Sişämbedä amerikan oçqıçları Bagdadnıñ şiği Sadr bistäsendä häm Fallucada gisyançılar nığıtması dip sanalğan urınnarnı utqa tottı. Berniçä çit il totığı, şul isäptän Britan injenerı, ğisyançılar qulında qala birä. İordan patşası Abdulla, Ğiraq, saylawar ütkärü öçen şaqtıy qurqınıç urın, dip belderde.

Sişämbedä amerikan oçqıçları Bagdad tiräsen utqa totqannan soñ, başqalanıñ Sadr bistäsendä ber törkem ğiraqlı, xöcümdä hälaq bulğan suğışçınıñ cenazasına cıyıldı. Cirle xalıq äytüençä, amerikan oçqıçları häm tankları berniçä yortqa ut açqan. Amerikan xärbiläre üzläre töğäl-xädäfle xöcüm yasawların belderä, häm tınıç xalıq araısnda küp qorban buluın kire qağa. Sadr bistäsendä yäşäwçe Ali Motlaq başqa fikerdä:

"Oçqıçlar, ğädättägeçä, ber säbäpsez bombaladı. Bernindi qarşılıq yuq ide. Amerikannar, bezgä Mähdi armiäse xöcüm itte, diergä yarata. Läkin kiçä berni bulmadı. Bu cimerelgän yortlarnıñ, xatın-qız, balalarnıñ ni ğäyebe bar?"

Ğiraqnıñ başqa urınnarınnan kilgän xäbärlärgä qarağanda, könyaqtağı Basrada ğisyançılar ike Britan xärbien ütergän. Tönyaqtağı Kirkukta amerikannar ğisançı törkem başlığı dip şiklänelgän keşene qulğa alğan. Sönnilärneñ Falluca qalasında amerikannar, Äbü Musa Äl-Zärqawi keşeläre tuqtalğan dip şiklänelgän yortnı utqa totqan. Niçä keşeneñ hälaq bulğanı äytelmi. Äl-Qaidä belän bäyle Zarqawi törkeme Ğiraqta berniçä xöcüm, çit il keşeläreneñ, şul isäptän, soñğı waqıtta ike amerikannıñ başın kisü öçen cawaplılıqnı üz östenä aldı. Bu ike amerikan belän ber könne urlanğan Britan injenerı Ken Bigley äle dä şuşı törkem qulında dip sanala. Britaniäneñ Möselmannar Şurası Bigley''nı qotqaru maqsatı belän Bagdadqa törkemen cibärde. Şuranıñ äzğzası İnayat Bunglawala Azatlıqqa bolarnı äytte:

"Äbü Musa Äl-Zarqawinıñ Ken Bigley''nı totoçı Täwhid wäl Cihad törkeme üzen möselman dip tanıta. Alar üz ğämälen İslamğa tayanıp aqlıy. Ämmä bez İslam iseme belän totıqlarnı üterü, ğönahsız qan tügüne kisken räweştä kire qağabız. İslam andıy üterülärne aqlıy dip äytü – anı mäsxäräläw bulıp tora."

İke ay elek totıq itep alınğan İran diplomatı düşämbedä irekkä çığarıldı. Uzğan atna totıq itep alınğan 6 Misırlınıñ da bügen berse irekkä çığarıldı. Monı Reuters agentlığına Misırnıñ Ğiraqtağı ilçese Faruq Mabruq rasladı:

"Bu törkemneñ säyäsi tügel, açqa mänfäğäte bulğan axrı. Totıqlarnı azat itü öçen här çarağa barırğa kiräk, çönki bu alar, alarnıñ ğailäläre öçen ber ğazap. Alar bit monda Ğiraqnı tözekländerergä, xalıqqa yärdäm itergä dip kilgän."

Ul arada sişämbedä İordan patşası Abdulla, totıq itep alınğan ike İtalian watandaşı isän dip uylarğa nigez bar digän süzlär äytte. Ğisyançılar qulında tağın 2 fransuz jurnalsitı qala. Berük waqıtta Abdulla, Ğiraq, ğinwar ayına bilgelängän saylawlarğa baru öçen äle qurqnıç urın bulıp qala dide. Ägär ul moña barsa, Abdulla, ğisyannıñ tağı da köçäyüen farazlıy.

-Ali Gilmi
XS
SM
MD
LG