Şuşı könnärdä genä Tatarstan jurnalı baş möxärrire Rifat Fättaxov İranda uzğan töbäk mäglumat çaraları wäkilläreneñ eşlekle säfärendä qatnaştı. İrannıñ tışqı eşlär ministrlığı, Rusiäneñ İrandağı ilçelege yärdämendä jurnalistlar aralaşuı programması qısalarında ütkärelgän bu säyäxättä 35 töbäk agentlıqları, gazeta-jurnal citäkçeläre qatnaşqan. Törle millät, törle dini häm säyäsi qatlamnarınıñ wäkilläre bulsalar da, älege jurnalistlar forumında qatnaşuçılar açıq cämğiät qorunıñ möhimlegen añlıylar ikän. İran jurnalistları häm diplomatları Tatarstan häm tatarlar belän dä qızıqsınğannar. Rifat Fättaxov eşlekle säyäxättä qatnaşuçılarğa Tatarstan turında mäglumatlar birgän.
Qazanda ike kön bulğannan soñ ul artistlar törkeme belän Finländiägä yul tota ikän. Anda ikençe oktäberdä Räşit Wahapov isemendäge tatar cırı festivaleneñ Finländiä öleşe açılaçaq. Çärşämbe könne Tatarstan poyezdına utırır aldınnan Rifat Fättaxov Azatlıq radiosına Finländiä festivaleneñ oyıştıruçıları, anda qatnaşuçı Qazan artistları turında söyläde. Bu festival' Qazannan başqa Tübän Novgorodta, Qazaqstanda da oyıştırılğan. İnde çirat Räşit Wahapov üze ğömer buyı barırğa xıyallanğan Finländiägä citkän. Festival'neñ maqsatı - tatar xalqınıñ milli berdämlegen saqlap qalu, dide Rifat Fättaxov.
Bilgele bulğança, tatar xalqınıñ kürenekle cırçısı soñğı yıllarda beraz onıtılıp torğannan soñ, xäzerge zaman keşeläreneñ iğtibarın cälep itkän Räşit Wahapov festivale yaz könne Qazanda başlanğan ide. Tatar mädäniäten häm muzıkasın kiñ xalıqqa taratu öçen möhim bulğan bu eş däwam itä, bäygelär Tatarstanda ğına tügel, Rusiä töbäklärendä, xätta çit illärdä dä ütä. Şuña da, älege bäygene planlaştırılğança bıyıl köz tügel, ä kiläse yılda ğına tämamlarğa turı kiler, di Rifat Fättaxov.
Xel'sinkida bulaçaq tatar cırı mäcleseneñ niçek ütüe turında Rifat Fättaxov Azatlıq tıñlawçılarına xäbär itärgä wäğdä itte. Ä çärşämbe kiçendä Qazan artistları häm cämäğät eşlekleläre Xel'sinkiğa taba yulğa çıqtılar.
Rimzil' Wäli
