Accessibility links

Putinne tänqitlägän açıq xatnı Litvanıñ elekke prezidentı häm Russiäneñ säyäsi küzätüçese niçek bäyäli?


Kiçäge tapşıruıbızda tışqı säyäsät buyınça yözdän artıq amerikan häm yevropalı belgeçneñ Russiä prezidentı Putinne ildä demokratiäne çiklävdä häm aftoritar xakimiät urnaştırırğa tırışuda ğäyepläp yazğan açıq xatı turında amerikan gazetası Washington Postta basılıp çıqqan maqälä belän tanıştırğa idek. Bügen Russiäneñ politik küzätüçese Sergey Markovnıñ häm xatqa imza itkän Litvanıñ elekke prezidentı Landsbergisnıñ radiobız xäbärçesenä äytkän fikeräre belän tanıştırabız

Maqälädä dä äytelgänçä, açıq xatqa AQŞ häm Yevropa illäreneñ elekke prezidentları, parlament deputatları , ğalimnär, aftorlar häm ziyalılar, 100-dön artıq tanılğan şäxes qul quyğan. Xatnıñ töp sponserları arasında amerikan senatorları respublikan John McCain häm demokrat Yosef Biden , Cexiäneñ elekke prezidentı Vacslav Havel, Şvetsiäneñ elekke premiere Karl Bildt häm Litvanıñ elekke prezidentı Landsbergis ta bar. Landsbergisnıñ radiobız xäbärçesenä belderüenä qarağanda, xatnıñ maqsäte Russiä demokratik il bularaq täräqqi itä digän fikerdä bulğan Könbatış citäkçelären uyanırğa çaqıru bulıp tora.

Audio

"Ul Russiä demokratik il, anda progress häm reformalar bara dip ışanğan häm nindider däräcädä ber qatlılıq kürsätkän Könbatışnıñ qayber citäkçelären, cämğiätne häm mäxällärne kisätü bulıp tora."

Anıñ süzlärençä, xat şulay uq Russiädä demokratiäne yaqlauçılarnı qıulandıru öçen dä yazılğan.

Audio

"Bu şulay uq Russiädä demokratiägä äle dä ışanğan häm monıñ öçen köräşkän az sandağı şäxeslärne yaqlau häm - Sez yalğız tügel. Sez onıtılmağan- digän işarä cibärü dä bulıp tora. "

Landsbergis xat Könbatış citäkçelären Vladimer Putinneñ xökümätenä realistiğıraq bäyä birüenä, anıñ aftoritar rejimğa äylnä baruın añlaularına yardäm itär dip ömetlänä.

Politik öyränüläre buyınça Mäskäv Üzäge direktorı Sergey Markov xatqa qul quyuçılar Putinneñ pozitsiäsen yalğış añlıylar . Prezident politik teoriälär belän tügel, ä praktik näticälär belän genä qızıqsına dip belderde.

Audio

"Putinneñ fikerençä, politik oyışmalar eşlägän xäldä genä faydalı . Qayber oçraqlarda Russiädä sivl cämğiät häm xökümät oyışmaları zäğif bulğannıqtan , alar eşlämi. Vladimer Putin demokratik oyışmalar eşlämägändä, başqa oyışmalardan faydalanunı östeneräk kürä."

Markovnıñ süzlärençä, Russiä komminizm çorınan küçü däverendä dip uylau xata. Bu idea inde iskergän.

Audio

"Monı idarä itelgän demokratiä dip atap bula. Bu inde Russiä totalitar da, demokratik ta il tügel digän süz. Läkin, Russiä demokratiä yulında. Läkin, bu yul qaydan kilä? Kommunistik diktaturadanmı ? Yuq. Russiä kommunistik diktatura yulınnan kilmi. Çönki Russiädä kommunistik diktatura inde cimerelep annan kilgän yul xaos häm anarxiägä kiterde. Vladimer Putin xäzer Russiäne xaos häm anarxiädän şuşı küçmä däverdä totrıqlıraq demokratiägä alıp barırğa tırışa."

Xatta Könbatış xökümätläreneñ Russiädä demokratik köçlär safına basuı häm Russiädä bulıp yatqannar xaqında döreslekne söyläve öçen vaqıt citte dielgän.

Färit İdelle, Praga.
XS
SM
MD
LG