Accessibility links

чәршәмбе, 7 декабрь 2016, Казан вакыты 23:14

Awıl tormışı manzaraları. Yäşlär nigä şähärgä kitä?


29nçe sentäberdä Baltaç rayonında ütkän respublika küläm cıyılış xaqında söylägän idek. Bügen awıl tormışına täfsilläbräk tuqtalırğa buldıq. Respublika cıyılışında awıl yäşlären toraq belän tä’min itü mäs’älälären qaradılar. Anda respublika rayon başlıqlarınıñ urınbasarları cıyıldı, alar, här rayonda bulğan wazğiät turında söyläde. Misal itep Baltaç rayonı täcribäse belän tanıştırdılar. Qunaqlarnı rayon xakimiätläre yuğarı däräcädä qabul itte, «Yäş ğailälärne toraq belän tä’min itü programması» qısalarında yort salıp yäşi başlağan ğailälär belän tanıştırdı. Baltaçta äytkänebezçä, yort salıp beterergä aqça belän bulışalar. Annan soñ, ğailä federal programmağa qatnaşuğa ireşsä, bala tuu belän, kreditnı qaytarmaw bäxetenä dä ireşä. Menä mäsälän, Baltaçta yäşäwçe Ayrat belän Läysän Ğataullinnar gailäse şundıylardan.

Baltaç rayon xakimiätläre 20-30 meñlek kreditlarnı birsä, başqa cirlärdä, ikençe keşelärdän qalğan fatirlarnı satıp alırğa bulışalar, yäki ör yañadan yört salırğa tözeleş materialların birälär. Qısqası, respublikanıñ 33 rayonında, äzme-küpme, bu programma ütälä. Yäşlär eşläre ministrlığı äle ul qanunğa tözätmälär kertep, däwlät birä torğan kreditnı 300 meñgä qädär arttırırğa teli häm 2005 yıl byudjetında, programmanıñ ütäleşe öçen 150 million sum sorarğa isäpläp tora. Awılda yäşäp qalu, ğailä qoru öçen şartlar tudırıla, digän tä’sir qalsa da, yäşlär nigäder barıber şähär yağına qarıy. Törle cıyılışlarda, yış qına, awıllarda öylänmägän yegetlär küp, alar ömetsezlektän eçügä sabışa, dip äytelä. Nigä yegetlär buydaq bulıp yäşäp yata? Nigä yäşlär zur şähärlärgä kitälär? Awılda tormış itep bulamı? Şul xaqta Baltaç rayonnıñ Norma, Sulawıç, Or awıllarında oçrağan keşelär belän söyläştek. Kübesençä ölkän yäştäge apalar oçradı. Alar pensiä yäşärgä citä, läkin awılda eşlärgä eş citep betmi, dip äytte. Baltaç rayonı başlığı urınbasarı Şakirov Ramil İldus ulı, yäşärgä telägen keşelärgä barlıq şartlar da tudırılğan dip äytsä dä, eşsezlek barlığın tanıdı. Belgeçlek alğan yäşlärneñ barısın da, eş urınnarı belän tä’min itep beterä almıybız, dide ul. Anıñ äytüençä, eşlägän oçraqta, xezmätkärgä iñ kübe 2 500 sumlıq eş xaqı tülänä. Eş xaqı waqıtında birelep barıla, dip iğlan itelä. Baltaç rayon başlığı, 29sentäber cıyılışında iğlan itkänçä, eş xaqı äz bulğanğa, xalıq kübesençä, mal üsterep kön kürä. Awıl tormışı turında yulyazmalarnı, «Azatlıq» radiosınıñ aldağı tapşırularında da işetersez.



Bikä Timerova.

XS
SM
MD
LG