Accessibility links

Кайнар хәбәр

Milli matbuğatqa yaña köçlär kilerme


Qazan universitetında jurnalistika fakul'tetınıñ tatar bülegenä bıyıl 29 keşe uqırğa kerde. Universitetqa yaña ayaq basqan yeget-qızlarnı jurnalistikada qızıqsındırğan yünäleşlär, älbättä, törleçä. Säyäsät, mäğärif, sport, sänğät belän qızıqsınalar. Ä millät yazmışına alar niçek qarıy? Ğomumän bulaçaq tatar jurnalistları milli temadan çittä tora alamı? Şuşı könnärdä studentlar Bötendönya tatar kongressı Başqarma komitetı belän tanıştılar. Alar aldında Kongressnıñ Başqarma komitetı xezmätkärläre Röstäm Ğäynetdinov, Mönirä Xalitova, yäş ğalim Nail' Ğäripov, Bötendönya tatar yäşläre forumı citäkçese Azat İslaev çığış yasadı. Bu oçraşuda studentlar kongressnıñ eşçänlege, xezmätkärläre belän tanıştı. Tatar kongressı aşa yıl sayın Qazannıñ yuğarı uqu yortlarına kerüçe Rossiä häm çit il töbäklärendäge yäşlär turında belde. Röstäm Ğäynetdinov tatar yäşläreneñ üz tellären belmäwenä, tatar mäktäpläreneñ bik az buluına iğtibar itte häm milli-säyäsi problemalar turında da söyläde. Şulay uq studentlar tatar yäşläre forumınıñ eşçänlege, anda qatnaşuçı yäşlär, forumğa qağılışlı problemalar turında da işette. Kongressta ütkän oçraşuda törle töbäklärdän yaña uqırğa kilgän yäşlär, bigräk tä jurnalistika fakul'tetı studentları öçen adaptatsion üzäk oyıştıru kiräklege xaqında da äytelde. Bötendönya tatar Kongressı studentlarnı xezmättäşlekkä dä çaqırdı. Bulaçaq tatar jurnalistları berençe uqu ayında teoriä sabaqların alğannan soñ ğämäli eşlär belän tanışunı Bötendönya tatar Kongressınnan başladı.

Al'bina Zäynulla, Qazan.

XS
SM
MD
LG