Accessibility links

шимбә, 10 декабрь 2016, Казан вакыты 04:17

Mostay Kärimgä 85 yäş tula


Mäğlüm ki, bu yılnıñ üktäber azağında Başqortstannıñ xalıq şağire Mostay Kärimgä 85 yäş tula. Şuşı uñaydan, respublikada Ministrlar kabinetınıñ maxsus färmanına asäsan, bixisäp mädäni çaralar oyıştıru bilgelängän. Xalıq şağireneñ yübileyenä äzerlek bügennän ük bik nıqlı bara. Äle Başqortstan «Kitap» näşriätı Mostay Kärimneñ istäleklärdän torğan «Tormış mizgelläre» isemle kitabın näşer itte. Mostay Kärimneñ tormış häm icat yulına bağışlanğan kitaplar da dönya kürä. Yañaraq İlyäs Wälievnıñ «Mostay Kärim: yawgir, şağir, grajdanin» dip atalğan kitabı basılıp çıqqan ide. Mäskäwdäge Xalıqara kitap kürgäzmä – yärminkäsendä şuşı kitapnıñ isem tuyı bulıp ütte. «Başqortstan» däwlät kinostudiäse dä Mostay Kärimgä kürkäm yübileye uñayınnan ike büläk äzerli. Anıñ berse näfis film, ikençese – doqumental film. Başqortstan kino töşerüçeläre xalıq şağireneñ «Ozın – ozaq balaçaq» poweste buyınça näfis filmnı töşerep betep kilä. Kinostudiä rejisserı Bulat Yosıpov äytüençä, filmnıñ isemen «Kendek» dip atarğa bulğannar. Bilgele ki, Mostay Kärimneñ bala çağındağı quşamatı da «kendek» bulğan. Kino töşerüçelär Mostay Kärimneñ tormış yulın häm icatın tulıraq çağıldırğan doqumental filmnı töşerüne dä üz östenä alğan ide. Ğäyät zur häm mäşäkätle bu eş tä tämamlanuğa bara. Mostay Kärimneñ 85 yäşlek yübileye üktäber azağında Başqortstan däwlät opera häm balet teatrında ütäçäk. Älege köndä xalıq şağire Ufanıñ qayber yuğarı uqu yortlarında häm mäktäplärdä, gimnaziälärdä uquçılar belän yübiley aldı oçraşuların başladı da inde. Çirattağı şundıy oçraşu Başqortstan däwlät uniwersitetında ütte. Mostay Kärim yuğarı belemne näq menä şuşı uniwersitetta alğan. Studentlar häm möğallimnär belän oçraşu bik matur oyıştırılğan ide. Kiçä şiğerlär uqu häm istäleklär söyläw, şulay uq cır – moñ belän aralaşıp bardı. Uniwersitet talipları oluğ ädipkä istälekle büläklären dä tapşırdı.

XS
SM
MD
LG