Accessibility links

пәнҗешәмбе, 8 декабрь 2016, Казан вакыты 21:04

Bäyräm diep, eş tä onıtılmıy


Tatarstanda bu könnärdä bäyräm mäşäqätläre belän şöğellänälär. 1 oktäber könne respublikada Olılar könen bäyräm ittelär. Xäyer, Olılar köne uñayınnan çaralar ber kön genä barmadı. Oçraşular, büläkläwlär, tüläwsez tabiplarğa, çäçtaraşlarğa, munçağa baru kebek çaralar berniçä kön däwamında mömkin ide. Olılarnı räsmi räweştä respublikanıñ Däwlät Şurası räise Färit Möxämmätşin qotladı. Ä yäkşämbe könne respublikanıñ uqıtuçıları üzläreneñ hönäri bäyrämnären bilgeläp ütäçäk. Räsmi räweştä uqıtuçılar köne inde menä berniçä yıl 5 oktäbergä bilgelängän bulsa da, uqıtuçılar da, uquçılar, alarnıñ ata-anaları da yış qına elekkeçä, oktäberneñ berençe yäkşämbesendä bäyräm itä. Mäğärif ministrlığı respublika uqıtuçılarınıñ iñ layıqlıların Piramida küñel açu üzägenä cıyıp, 1 oktäber könne Uqıtuçılar könen bäyräm itte. Balalar ostazların qotlarğa häm büläklärgä premyer-ministr urınbasarı Zilä Wälieva, Mäğärif ministrı Räis Şäyxlislamov kilde. Qazan uqıtuçılarınıñ räsmi tantanası isä 5 oktäber könne uzaçaq.

Bu arada bäyrämnär küp bulsa da, eş tä onıtılmıy. Räsmi bulmağan mäğlümätlärgä qarağanda, Qazannıñ Gorbunov isemendäge aviaberläşmäse belän Proyekt-3000 şirkäte arasında zur kileşü tözelgän. Älege kileşüdä Qazan aviatözüçeläre tarafınnan oçqıçlarnı arendağa birep toruçı Proyekt-3000 şirkäte öçen 2007 yıldan başlap 100 TU-334A oçqıçı yasaw qaralğan, dip xäbär itä Kommersant gäcite. Älege kileşüneñ bäyäse 1,5 milliard dollar. Bu Qazan aviatözüçeläre berniçä yılğa eş häm finanslar belän tä’min itelgän digän süz. Alabuğada isä bu könnärdä awıldağı keçe eşmäkärlekkä yärdäm itü programması eşli başladı. Anıñ qısalarında awılda yäşäwçe eşsezlärgä terlek satıp alırğa aqça bireläçäk. Älege programmada qaralğan aqçalar oçqıçlar tözü tarmağınnan meñlägän märtäbägä azraq bulsa da, alar awıl xalqına şaqtıy zur yärdäm kürsätergä mömkin.

Gölnaz İlgizär

XS
SM
MD
LG