Accessibility links

сишәмбе, 6 декабрь 2016, Казан вакыты 21:06

Abxaziädä prezident saylawları ütte – kem ciñgäne älegä bilgesez, ämmä Tbilisiğa qarata mönäsäbät mäğlüm


Yäkşämbedä Abxaziädä ütkän prezident saylawları näticäläre turında düşämbedä qarşılıqlı xäbärlär kilde. Başta ciñüne xäzerge prezident Vladislav Ardzinbanıñ warisı vitse-premier Raul Xajimba yawlağan dip iğlan itelgän ide. Soñraq saylaw räsmiläre bu xäbärne kire qaqtı. Ul arada opozitsiä namzäte "Çernomorskenergo" başlığı Sergei Bagapş üzeneñ ciñüe turında belderä.

Bu yazma äzerlängändä Abvaziäneñ berençe prezident saylawlarında kem ciñgäne äle bilgele tügel ide. Ämmä xäzer ük şunı äytep bula, yaña citäkçe itep kem genä saylanmasın, Suxumi belän Tbilisi arasında qarşılıqlar saqlanıp qalaçaq. Abxaz prezidentı urınna däğwa itkän 5 namzätneñ barısı da bäysezlek tarafdarları. Gruziä prezidentı Mixail Saakaşvili isä bu üzbilgelängän töbäkne Tbilisi kontrole astına qaytarırğa wäğdä itä.

Namzätlär bişäw bulsa da, töp köräş ikese arasında bardı: premier-ministr Raul Xajimba belän "Çernomorskenergo" kompaniäse başlığı Sergei Bagapş arasında. Sovet çorında KGB ofitserı bulğan Raul Xajimba xäzerge prezident Vladislav Ardzinba warisı sanala. Saylawaldı kampaniä barışında uramnarda anıñ Rusiä prezidentı Vladimir Putin belän töşkän räsemnäre elengän ide. Mäskäwdän kilgän säyäsätçelär, artistlar da anıñ öçen tawış birergä öndäde. Xajimba üze dä ciñep çığaçağına şiklänmäde sıman. Yäkşämbedä tawış birü urırına kilep bolay dide:

Audio (Raul Xajimba): "Käyef şäp, bu saylawlar bezneñ ni däräcädä demokratik, normal däwlät tözergä sälätle ikänebezne küräster."

Düşämbe irtäsendä saylaw komissiäseneñ İnternet säxifäsendä berençe urında 53% belän Raul Xajimba, ikençe urında 34% belän Sergei Bagapş digän berençe sannar kürende. Ber säğät tä ütmäde, saylaw räsmiläre bu mäglümätne kire qaqtı. Saylaw komissiäse wäkile, bez bu sannarnıñ İnternetqa niçek elägüen tikşeräbez, dide.

Ul arada Sergei Bagapş üzeneñ ciñüe turında belderä. Opozitsiä wäkilläre mäglümätenä qarağanda berençe urında 51% belän näq menä ul bara, ä Xajimba 32% belän ikençe urında. "Çernomorskenergo" başlığı saylawaldı kompaniäsendä Abxaziäneñ iqtisadi möşkel xälenä, xalıqara tanılmawına basım yasadı. Yäkşämbedä, kem öçen tawış biräsez, digän sorawğa bolay dide:

Audio (Sergei Bagapş): "Üzemneñ häm ilemneñ kiläçäge öçen, dide. Abxaziä bäysez häm mul, xalqı – berdäm bulsın, citäkçesen ixtiram itsen, ä citäkçe – xalqın ixtiram itsen."

Şulay itep, töp nazmätlärneñ ikese dä bäysezlek turında söyli, bu oçraqta süz Tbilisidan bäysezlek turında bara. Gruziä öçen alarnıñ qaysısı yaxşıraq, digän sorawğa, Gruziäneñ Nizağlarnı xäl itü ministrı Georgi Xaindrava, ikese dä ber çama, berse dä Gruziä taraflı tügel dide. Bezneñ qaraşqa ciñüne opozitsiä wäkile yawlağan, ämmä bu mäsälä barıber Mäskäwdä xäl itelä, dip östäde ul.

Gruziägä qarata yaqın qaraşta torsalar da, Rusiägä qarata ike nazmättä beraz ayırma bar. Xajimba Mäskäw keşese sanala, Rusiä belän tığız bäyläneşlärne saqlarğa wäğdä itä. Mäglüm ki, abxazlarnıñ kübese Rusiä pasportı yörtä. Täbäktä lari tügel, rubl äyläneştä. Abaxaz kurortları urıslarnıñ yaratqan yal itü urını. Bagapş isä Rusiägä ul qädäre mökibbän tügel, häm dä bäysezlek süzen kiñräk mäğnädä añlıy.

-Ali Gilmi
XS
SM
MD
LG