Accessibility links

шимбә, 3 декабрь 2016, Казан вакыты 05:42

Uqıtuçılar kiläçäkkä ömet belän qarıy


Qıñğıraw tawışı yılnıñ 9 ayı däwamında Tatarstannıñ 50 meñgä yaqın uqıtuçısın eşkä, balalar yanına çaqıra. Bügen dä näq şulay buldı. Läkin uqıtuçılar öçen 5 oktäber – üzençälekle kön, çönki bu – Uqıtuçılar köne. Xäyer, elek pedagoglar üzläreneñ hönäri bäyrämnären oktäber ayınıñ berençe yäkşämbesendä bilgeläp ütälär ide. Berniçä yıldan birle, tögälräk äytsäk, 1994 yıldan, älege bäyrämne Rusiädä dä bötendönya uqıtuçıları belän bergä 5 oktäber – Xalıqara Uqıtuçılar könendä bilgeläp ütä başladılar. Xäyer, üzläreneñ ostazların hönäri bäyrämnäre belän iskeçä aynıñ berençe yäkşämbesendä täbrikläwçelär dä bar. Respublika uqıtuçıların bäyräm uñayınnan xörmätläw inde 1 oktäberdä ük uzdı. 5 könne isä Tatarstannıñ Mäğärif ministrı Räis Şäyxlislamovnıñ Uqıtuçılar köne uñayınnan räsmi qotlawı dönya kürde. Sişämbe könne Qazan mäğärif xezmätkärlären Zur konsertlar zalında qotladılar.

Xäyer, älege bäyrämnärgä bar uqıtuçılar da kilä almıy. Alarnı uquçılar, ata-analar här mäktäptä üzlärençä täbrikli. Menä, mäsälän, respublikanıñ Apas rayonınıñ Apas urta mäktäbendä bäyräm uñayınnan uquçılar üzläreneñ ostazların eştän azat itälär ikän. Bu könne mäktäptä däreslärne ölkän klass uquçıları alıp bara. Bu xaqta Azatlıq radiosı tıñlawçılarına Apas mäktäbe uqıtuçısı Roza Nurğälieva söyläde.

Roza xanım Apas urta mäktäbendä inde küp yıllar eşli. Şuña da, uqıtuçı hönäreneñ awır yaqların da, küñelle mizgellären dä bik yaxşı belä. Bez anardan bügenge mäktäp tormışı, uquçılar xaqında, pedagog xezmäte turında soraştıq.

Uqıtuçı hönäre bik maqtawlı häm awır xezmät inde ul. Menä min mäktäptä 25nçe yıl eşlim. Bıyıl tağın berençe klassta balalarnı uqıtam. Alar barısı da mäktäpkä bik yaratıp yöri. Uqıtuçılar da, niçek kenä qıyın bulmasın, üzläreneñ xezmätlären tırışıp başqara. Uqıtuçılar haman şul balalar, mäktäp turında uylıy. Xättä öydä, qunaqta da

Bäyräm könendä matdi problemalar xaqında iskä töşeräse kilmäsä dä, Roza Nurğälieva bezgä uqıtuçı hönären bu yağı xaqında da söyläde. Alar baytaq. Şulay da, balalarnı, üz hönären yaratqan mäğärif xezmätkärläre kiläçäkkä ömet belän qarıy.

Azatlıq radiosı da Uqıtuçılarğa bäyräm uñayınnan yañğırağan bar matur teläklärgä quşılıp, alarnı hönäri bäyrämnäre belän qotlıy.

Gölnaz İlgizär

XS
SM
MD
LG