Accessibility links

якшәмбе, 4 декабрь 2016, Казан вакыты 19:24

Äfğanstan prezidentı Hamid Qarzai Ğazni şähärendä saylawaldı säfärendä buldı


Bu şimbä Äfğanstanda ütäçäk prezident saylawlarında töp namzätlärneñ berse dip sanalğan ilneñ xäzerge prezidentı Hamid Qarzai bügen könyaqtağı Ğazni şähärendä bulıp xalıq belän oçraşıp yörde: "Namzätlärneñ qaysısı ciñügä qaramastan bez anı prezident itep qabul itäçäkbez. Tuğannar, irekle räweştä üz tawışlarığıznı biregez, basım yuq" dip möräcäğät itte Qarzai. Qarzai tınıç, totrıqlı häm çäçäk atqan Äfğanstan wağdä itä. Qalğan 17 namzät belän çağıştırğanda anıñ ciñep çığu ixtimalı zurraq dip farazlana. Xalıqara Migrasiä Oyışması İranda häm Paqstandağı äfğan qaçaqları arasında saylawçılarnı terkäw eşen tämamlawın xäbär itte. Paqstanda 740 meñgä yaqın äfğan qaçağı tawış birüdä qatnaşaçaq dip kötelä. Keşe xoquqları torışın küzätep baruçı Human Rights Watch oyışması Äfğanstan xatın-qızlarınıñ xoquqları äle dä bozıla, dip xäbär itte. Prezident saylawlarında qatnaşırğa telägän xatın-qızlarğa yanawlar, ezärlekläw häm höcüm itü oçraqları bar. Alay da 4 millionğa yaqın xatın-qız tawış birer öçen terkälgän häm 1 millionğa yaqın qız-bala mäktäpkä yöri. Bu – quanıçlı xäbär, di Human Rights Watch oyışması. Ämma ildä xatın-qızlarnı censi ezärlekläw, yäş xatın-qızlarnı burıçlarnı tülär öçen satu däwam itä. Äfğan xatın-qızlarınıñ yartısınnan kübräge 16 yäşe tulğançı kiyägä birelä.

XS
SM
MD
LG