Accessibility links

якшәмбе, 4 декабрь 2016, Казан вакыты 23:20

Qırıs iminlek çaraları sürätendä Çeçnädä yaña prezident eşli başladı


Sişämbedä Çeçnädä yaña prezident eşli başladı. Qırıs iminlek çaraları şartlarında anda Mäskäw yaqlawı belän saylanğan Alu Alxanov wazifasına kereşü antın birde. May ayında üterelgän elekke prezident Äxmät Qadırovnıñ şuşı warisı üz çığışında bar Tönyaq Kavkazğa tınıçlıq alıp kiläçägen wäğdä itte.

Sişämbedä Groznıyda uzğan ant itü tantanasında yaña prezident Alu Alxanov distä yıl buyı suğıştan intekkän Çeçnäne totrıqlılıqqa kiterergä tırışaçağın belderde.

Audio, Alu Alxanov

"Bezneñ bar omtılışlarıbız, bar ğämällärebez çäçän xalqın berläşterügä häm bergä tuplawğa, iñ güzäl ğädätlärebezne torğızuğa, respublika iqtisadın wä sotsial tormışın ayaqqa bastıruğa yünälteläçäk" dip ışandıra Alu Alxanov. Ä älegä bu bik yıraqta torğan ber maqsat bulıp qala - Çeçnädä totrıqlılıqqa yul ozın bulırğa oşap tora. Yaña prezidentnıñ ant itü tantanası qayda häm qayçan bulaçağı da soñğı mizgelgä qädär ser itep totıldı. Groznıyda bu uñaydan qırıs iminlek çaraları kürelgän ide. Şähär uramnarı nıq qorallanğan militsiä tarafınnan saqlandı. Xökümät utarı yanında tantana öçen maxsus qorılğan çatırğa bar qatnaşuçılar da centekläp tikşerelep kenä kertelde. Elekke prezident Äxmät Qadırov may ayında bomba höcümendä üterelgännän soñ xakimiat xäzer anıñ qabatlanuınnan qurqıp ğädättän tış çaralar kürä. Alxanov näq menä Qadırov ülemennän soñ ütkärelgän saylawlarda ciñep çıqqan ide, ul moña nigezdä Mäskäw yaqlawı belän genä ireşte. Sişämbe çığışında Alu Alxanov Qadırovnı maxsus telgä alıp, ul da näq bez telägänne - xakimiatneñ xalıq belän bergäläşep respublikada tınıç, totrıqlı häm imin tormış qoruın maqsat itep quyğan ide dip belderde.

Audio, Alu Alxanov

Alxanovnıñ terror häm yulbasarlıqnı ciñüne töp maqsatlarnıñ berse itep quyuı yuqqa tügel - ul 29-nçı awgustta prezident itep saylanğannan birle Rusiäne berniçä dähşätle terror höcüme teträtte. Alarnı oyıştırunı üz östenä Mäskäwneñ Çeçnädäge xakimiatenä qarşı köräşkän qayber çäçän ğisyançıları aldı. Şul waqıt eçendä bar Rusiä buylap yasalğan höcümnärdä 430-dan artıq keşe hälak buldı. Prezident Putin üze xakimiatkä çäçän qarşılığın bastıru wäğdäse belän kilgän ide, läkin Tönyaq Kavkazdağı suğışnıñ älegä oçı-qorıyı kürenmi. Şuña kürä ul Çeçnädä wäzğiatneñ normal''läşüen kürsätkän çaralarğa bara. Başta Qadırovnı, ä annarı Alxanovnı prezident itep saylatu da şular rätennän ide. Yaña çäçän prezidentınıñ suğışnı beterü häm respublikada totrıqlılıq urnaştıru yünäleşendä nilär eşli aluı haman da soraw bulıp qala. Saylawlar aldınnan Alu Alxanov Çeçnädä 70 protsentqa citkän eşsezlekne beterüne wäğdä itkän ide. Moñardan tış ul, turıdan-turı bulmasa da, bäysezlek dawlawçı elekke çäçän prezidentı Aslan Masxadov belän söyläşülär başlıy aluı xaqında da beldergän ide. Ägär dä Masxadov üzeneñ bäysezlek omtılışlarınnan waz kiçsä digän şart belän.

Kärim Kamal
XS
SM
MD
LG