Accessibility links

сишәмбе, 6 декабрь 2016, Казан вакыты 13:22

Quşma Ştatlarda vitse-prezident nämzätläre arasında da debatlar uzdı


Amerika Quşma Ştatlarında kiläse ayda uzaçaq prezident saylawlarına äzerlek däwam itä. İke töp nämzät - xäzerge prezident George Bush häm anıñ demokrat köndäşe John Kerry arasında ütkän berençe debattan soñ näq şundıy uq fiker köräşe vitse-prezidentlıqqa däğwa itkän Dick Cheney häm John Edwards arasında da uzdı. Ğiraq suğışınnan alıp Quşma Ştatlarnıñ iqtisadi xälenä qädär tikşerelgän şuşı debatlarda alay da ayırım ber ciñüçe açıqlanmadı, ike nämzät tä bäxäsne osta alıp bardı.

Küzätüçelär vitse-prezidentlıqqa däğwa itkän respublikan Dick Cheney häm demokrat John Edwards arasındağı duel'' prezident nämzätlärenekennän küpkä suğışçanraq häm tänqit yağınnan qarağanda mäğnäleräk buldı digän fiker belderä. Säğät yarım barğan debatlardağı çığışın xäzerge vitse-prezident Cheney, amerikan saylawçısı öçen şaqtıy ärnüle mäs''älä - Ğiraq suğışın yaqlaw süzläre belän başlap cibärde.

Audio, Dick Cheney

"Bez Ğiraqta näq menä iñ zaruri närsäne eşlädek. Ägär dä min bu ölkädä tağın ber märtäbä kiñäş birä alsam, näq şunı uq, şul uq ğämällärne kiñäş itär idem. Saddamnıñ bügen totqında utıruı, ä anıñ xökümäte xakimiattä utırmawı arqasında dönya küpkä iminräk. Bez kiräk närsäne eşlädek" dip belderä Dick Cheney. Anıñ köndäşe John Edwards moña, "vitse-prezident äfände, sez äle haman da amerikan xalqı belän çın küñeldän, açıqtan-açıq söyläşmisez" dip cawap qaytara. Ul Ğiraqta xäzer kilep tuğan awır wäzğiatne sürätläp, John Kerry belän xakimiatkä saylanğan oçraqta andağı xälne yaxşırtaçağın wäğdä itä.

Audio, John Edwards

"Bezgä eşne yañaça başlaw kiräk. Bezgä Ğiraqnıñ üz köçlären äzerläwçe, monıñ öçen kübräk keşe cälep itüçe prezident kiräk. Bezgä Ğiraq xalqı fayda kürä başlaw öçen andağı tözekländerüne tizlätergä kiräk. Şuña kürä dä bez bu eşlärgä kübräk keşelärne cälep itärlek, ışanıçlı prezidentqa moxtac, John Kerry şundıy keşe" dip belderä Edwards. George Bushnıñ uzğan atnada demokrat nämzät John Kerry belän ütkärgän debatında östenlek soñğısına, Kerrygä birelgän ide. Ul üzen şaqtıy ışanıçlı tottı, anıñ tänqite dä, cawapları da eçtälekle buldı. Bush isä yış qına açuın kürsätkäläde. Ämma vitse-prezident urınına däğwa itkän Cheney dä, Edwards ta üz debatın bik sabır häm sallı alıp bardı. 63 yäşlek xäzerge vitse-prezident üzen täcribäle, inde küpne kürgän häm küp närsä aşa ütkän säyäsmän itep sürätlärgä tırışsa, 51 yäşlek senator Edwards üzeneñ başta advokat bulıp, ä soñraq senatta eşläw täcribäsenä tayanuın kürsätte. Debatlarda kütärelgän temalar arasında Ğiraq suğışı ğına tügel, Quşma Ştatlardağı eşsezlek, İranğa qarata säyäsät, AİDS çirenä qarşı çaralar kürü, Yaqın Könçığıştağı wäzğiat kebek mäs''älälär dä bar ide. Vitse-prezident nämzätläre andıy üzara süz köräşterüne ber märtäbä genä ütkärä, ä prezidentlıqqa däğwa itüçelärneñ debatları 3 bulaçaq. Şularnıñ berse inde uzdı, çirattağısı comğa könne Saint Louis şähärendä ütäçäk, öçençese kiläse çärşämbegä bilgelängän, anısı Arizona ştatınıñ Tempo şähärendä bula. Saylawlar isä Quşma Ştatlarda noyäbrneñ 2-sendä uzaçaq.

Kärim Kamal
XS
SM
MD
LG