Accessibility links

Кайнар хәбәр

Räzil Wäliev: "Latin xärefläre röxsät itelmäsä, Tatarstan xalıqara mäxkämäğä möräcäğät itäçäk"


Latin grafikası torğızu turındağı Tatarstan qanunnıñ kiläçäk yazmışı, xäzer Rusiä konstitutsiä mäxkämäseneñ qararına bäyle. Mäxkämä, Rusiä subyektları cirle xalıqnıñ yazuına qağılışlı mäs’älälärne üzläre xäl itärgä xoquqlı, digän qarar çığarsa, wazğiät qaysı yaqqa üzgäräçäk? Ägär, mäxkämä, Duma qararı häm Rusiä Konstitutsiäse arasında qarşılıq yuq, digän näticä çığarsa, Tatarstan deputatları üzlären niçek totar? Bu sorawnı Tatarstan Däwlät Şurasınıñ fän, mäğärif, milli mäs’älälär komitetı başlığı Razil Wälievqa birdek. Anıñ äytüenä qarağanda, Tatarstanğa xäl itärgä xoquq birelsä, qanunnı tormışqa aşıru başlanır ide. Latinğa küçü turındağı däwlät programması tözelep, parlament tarafınnan qabul itelep, Prezident qul quyıp, eş başlanır ide. Ägär, Konstitutsiä mäsäläse, Tatarstan faydasına qarar çığarmasa, Tatarstan deputatları, keşe xoquqların yaqlaw oyışmalarına, Strasburgtağı xalıqara mäxkämäğä möräcäğät itärgä isäpläp tora.Tatarstan Däwlät Şurasınıñ fän, mäğärif, milli mäsälälär komitetı başlığı Razil Wäliev äytkänçä, mäxkämäneñ qararı uñay bulsa, latin grafikasın torğızu öçen 2005 yıl byudjetına aqça tabılır ide. Küptän tügel qabul itelgän, Respublika xalıqları tellären üsterü däwlät programmasında da, latinğa küçü öçen aqçalar qaralğan ikän. Yäğni, Tatarstan xakimiätläre mäxkämädä ciñügä ireşergä ömet itä.

Bikä Timerova.

XS
SM
MD
LG