Uzğan töndä Misırnıñ diñgez buyında yal itü cirendä, Sinay yarım utrawında bulğan şartlawlardan soñ Izrael häm Misır citäkçeläre terrorğa qarşı köräştä berlektä çaralarnı köçäytergä kileşte. Taba şähärendä bulğan terror ğamälendä hälak bulğan 31 keşeneñ kübese – İzrael turistları. 120dän artıq keşe yaralanğan. Ülüçelär arasında ber Rusiä watandaşı da bar, Rusiäneñ mäğlümat çaraları olı yäştäge bu xatın-qız Ufadan bulğan dip xäbär itä. İzrael xakimiätläre terror ğamälläre öçen Al Qaeda çeltären ğayepläde. Misırdağı terrornı dönyadağı bik küp illär, şul sanda Britaniä, Germaniä, Törkiä häm Rusiä täñqitläde. Ğaräp Ligası höcümnär şok häm qurqu tudırdı, dip belderde. Yevropa Berlegeneñ tışqı säyäsät başlığı Javier Solana köç qullanunı tuqtatırğa çaqırdı: "Höcümnärne citdi töstä täñqit itäm. Ämma monnan tış böten keşegä möräcäğät itäm – bu däwamlı köç qullanu tuqtatılırğa tieş", dide Solana.
