Ästerxanda açılğan "Täwbä" mäçeten tözergä Tatarstan yärdäm itte

Xäzer borınğı tatar yağı Ästerxan turında söylibez. Biredä şimbä könne “Täwbä” mäçete açıldı. 70 meñ tatar, 140 meñ qazax, şaqtıy ğına nuğay, äzerbaycan häm başqa millät wäkilläre yäşi. Ämma şähärneñ Mäxällä dip atalğan töbägendä soñğı yöz yılda mäçet tözelmägän. İke-öç yıl elek xäzer wafat bulğan elekke gubernator Anatoliy Gujvin, ölkä möftie Nazembäk İl''yasov, Sovet rayonınıñ ul waqıttağı başlığı German Karasev şuşı mäçetne tözü öçen cawaplı şura tözegännär. Bu mäçetne şähär çitendä möselman ziratı yanında tözelüe turında qayberäwlär tarafınnan kinayäle fikerlär matbuğatta basılıp çıqtı. Ämma ike manaralı mähabät mäçet yanında möselmannarnı soñğı yulğa ozatu öçen maxsus bina bik üzençälekle tä''sir qaldıra. Şul uq töbäktä urıslar kümelä torğan qäberlek yanında pravoslav çirkäwe dä tözelgän. Mondıy ike dini bina yaqınlığı Qazan Kremlendäge Qol Şärif mäçete häm Blagoveşçensk çirkäwen xäterlätä. Bu oxşaşlıq şunda ğına betmi. Tatarstan prezidentı M.Şäymiev täwbä mäçeten tözügä zur ğına summa matdi yärdäm cibärgän. Şunlıqtan mäçet işek yanında märmär taqtada A.Gujvin häm M.Şäymiewnıñ izge eşe - yärdäme turında belderü uyılğan.

İslamğa qarşı basım, terrorçılıqta ğayepläw çorında Rusiä töbägendä mäçet açu zur rezonans uyattı. Ästerxanlılar “Täwbä” mäçete açıluğa M.Şäymiewnı çaqırğannar. Yaldan qaytuçı Tatarstan prezidentı amänäte buyınça, Ästerxanğa, respublika xökümäte qarşındağı din eşläre buyınça sovet räise Rinat Näbiev citäkçelegendä delegatsiä bardı. Ölkä gubernator wazifasın başqaruçı Aleksandr Jilkin, şähär-rayon başlıqları, mäçet açırğa yärdäm itkän sponsorlar, tözüçelär, şul isäptän rus, qazax, yähüd, ukrain, nuğay milläte wäkilläre, rus pravoslav wäkile otess Mixail üzläreneñ quanıçların häm ğorurlanuların yäşermädelär. Mäçet açu tantanasın möfti Nazembäk İl''yasov başlap cibärde.

Mäçet tözügä öleş kertkän qırıq keşegä “Täwbä” mäçeten tözegän öçen digän maxsus tamğa, bik matur eşlängän medal'' tapşırıldı. Monnan başqa medal''neñ doğa süzläre yazılğan häm asıl taşlar belän bizälgän berençe däräcädägese dä bar. Andıyları M.Şäymievkä, märxüm gubernator A.Gujvin, xäzer anıñ wazifasın başqaruçı A.Jilkin, tözügä yärdäm itüçelär şurası räise German Karasevka birergä qarar çığarılğan. Soñğı öç yıl ğömeren şuşı mäçetne tözügä bağışlağan Karasev bu könne iñ bäxetle keşe bulğandır. Meñnärçä möselmannar cıyılğan şuşı tantanada Tatarstan prezidentı isemennän Qol Şärif töşerelgän keläm “Täwbä” mäçetenä tapşırıldı. Tatarstannıñ din eşläre sovetı räise Rinat Näbiev prezidentnıñ qotlaw süzlären häm izge teläklären citkerde. Ğädäti bulmağan bu waqiğa zirat yanında çirkäw belän mäçet tözelü, törle din wäkilläreneñ ber-bersenä xörmät häm cılılıq belän qarawı, däwlät çinovniklarınıñ izgelek qıluları bu könnärdä xikmätle häm keşe ışanmas xäl bulıp kürenä. Bu izge eştä Tatarstan citäkçelegeneñ qatnaşlı buluı bügenge reportajnı respublika yañalıqları isemlegenä kertergä mömkinlek birde. Şundıy kiñäş: mömkinlegegez bulsa, şul mäçetne häm anıñ yanında tözelgän soñğı yulğa ozatu binasın internetqa, Azatlıq radiosınıñ säxifäsenä kerep qarağız äle. Annan tağın söyläşerbez.

Rimzil Wäli, Qazan