Accessibility links

Mäskäwdä tatar kitapxanäse açıldı


Uzğan atnanıñ yal könnäre mäskäwlelär öçen mädäni waqiğalarğa bay buldı. Berençedän, Mili mädäni üzäktä tantanalı räweştä kitapxanä açıldı. İkençedän Mäskäw studentları cıyılışı oyışması häm Mäskäwneñ “Zıyalılar” klubı da üz eşlären başlap cibärdelär, oçraşular ütkärdelär.

Bügenge xäbärläremdä Mädäni üzäk kitapxanä açılu waqiğasına ayırım tuqtalasım kilä. Çönki bu tantanağa Qazannan da qunaqlar kilgän ide. Şulay uq yäşlegem şuşı mädäni üzäktä ütte dip çığış yasağan tuqsan yäşlär tiräsendäge Rawza apa Kostrova da üzeneñ istälekläre belän urtaqlaştı. Mili mädäni üzäkneñ kitapxanäse urnaşqan bülmä zur tügel. Kitapxanä mödire bulıp inde berniçä ay eşläp kilgän Nurcidä Çanışeva qunaqlarnı buş bülmädä tügel, inde kitaplar belän tulğan kitiapxanädä qarşı aldı. Çönki mäskäwlelär kitapxanä öçen yarışıp diärlek kitaplarnı öylärennän dä alıp kilälär ikän. Şul uq waqıtta Bötendönya tatar kongressı da zur külämdä yaña basmalar büläk itep birgän. Kitapxanä açılışına kilgän Tatmedia qunaqları Sömbel Taişeva häm Färit Gäräev tä, Tatarstan xökümäte tarafınnan köndälek matbuğat basmaları häm kitaplar öçen million rubl aqça bülep birelde, sezneñ kitapxanägä dä öleş çığaçaq dip wägdä ittelär. Kitapxanägä äle üzläre alıp kilgän büläklären häm küçtänäçlären tapşırdılar. Kitapxanä açılunı tantanalı itep iglan itkän milli mädäni üzäk direktorı Änwär Xösäenov berençe süzne mäskäwneñ xalıqara mönäsäbätlär institutı professorı Äbdelxan Äxtämcanğa birde. Ul da kitapxanägä kitapların büläk itte. Annan başqa yaña açılğan kitapxanägä kitaplarnı professor Äğdäs Borxanov, “İnsan” näşriäte direktorı Yaxya Gibadullin da kitergän ide. Ä menä Nekrasov isemendäge kitapxanädän kilgän ictimaği eşlär häm töbäkära bäyläneşlär mödire Älfiä Arifullina büläk itkän kitaplar xaqında ayırıp äytäse kilä.

Ğomümän, Mäskäwdäge Nekrasov isemendäge kitapxanä elek elektän tatar yazuçıları belän oçraşu häm tatar ädäbiätına bağışlanğan kiçälär ütkärü urını da ide. Anıñ fondında Mäskäwdä iñ küp sanlı tatar kitapları saqlana. Älfiä xanım yaña kitapxanägä büläk itkän kitaplarnı öyennän alıp kilgän. Bu kitaplar minem ätiem kitapxanäsennän, läkin alar añar Asiä İzmaylovadan tapşırılğan kitaplar, dide Älfiä xanım. Ul kitaplarnıñ küpçelege Asiä İzmaylovağa kitaplarıñ awtorları tarafınnan imzalar belän büläk itelgän bulğan. Anda Ämirxan Yeniki häm başqa autorlarnıñ da kitapları bar ide. Ä inde jurnalist Äxmät Ğälimov kitapxanäneñ tarixına qaytıp, Mäskäwneñ milli kitapxanäläre arasında tatar kitapxanäse iñ bay, iñ küp sanlı kitapbı bulğan kitapxanä ide dip qayber mäglümätlär belän tanıştırdı.

Kitapxanä açılışında iñ qızıqlısı, milli mädäni üzäktä yäşlege uzğan bik olı yäştäge Roza apanıñ çığışı bulğandır. Şunısın da äytergä kiräk kitapxanägä işege yanında qızıl tasmanı tuqsan yäşlek Roza Kostrova belän “Ayqay” törkemendä qatnaşuçı, biş yäşendä genä buluğa qaramastan inde “Ence börektäre” festivale lawreatı Rufiä Sitdiqova kiste. Ber qarağanda bu simwolik ähämityäkä dä iä. Dimäk buınnar bäyläneşe özelmägän häm Rufiä cıyılğan xalıqqa Ğabdulla Tuqaynıñ “Ğäli belän käcä” şiğeren dä uqıp işetterde. Min äle bu milli üzäkkä berençe tapqır ğına kilgän Qazan qunağı Tatmidea wäkile Färit Gäräevtan täesirläre xaqında soradım. Häm ul bu kitapxanä xalıq häm Tatarstan xökümäte yärdämendä tağı zurraq binalarğa küçärlek bulıp üsär, Mäskäw tatarların törle kitapları belän häryaqlap qänäğätländerer dip belderde.

Kitapxanäne tantanalı açu barlıq xalıq belän berlektä “Tuğan tele” cırın cırlaw belän tämamlandı.

Näzifä Kärimowa, Mäskäw
XS
SM
MD
LG