Accessibility links

Кайнар хәбәр

Milli diskotekanıñ kiläçäge barmı?


Bu düşämbe kiçendä Bötendönya tatar yäşläre forumı “Qazan qabıza” isemle milli diskoteka ütkärde. Diskoteka “Qazan” milli mädäniät üzäge binasında uzdı. Küñel açu çarası säğät cidedä başlanırğa tieş ide. Ul beraz soñarıp sigezençe yartılar tiräsenä başlanıp kitte. Şul waqıt eçendä “Qazan” milli mädäniät üzägeneñ biü mäydançığına 50ләп keşe cıyıldı. Soñğı arada älege binada diskotekalar bulmağanğamı yäşlär törlese-törle poçmaqlarda törkem-törkem bulıp basıp tordılar. Ä qaysı berläre awız çılatırğa teläp tanspol qırıyında urnaşqan öställärgä utırıştılar.



Menä nihayät muzıka uynıy başladı. Xalıq äkrenläp “Piramida” küñel açu üzägennän kilgän di-djey “Cäy” quyğan köylärgä selkenergä dip biü mäydançığına taba atladı. Beraz biegännän soñ alıp baruçılar Dilärä İbrahimova belän İlşat İsxaqov säxnä türenä çığıp tamaşanı başlap cibärdelär. Berençe süz itep alar älege çaranı ütkärergä bulışqan Bötendönya tatar yäşläre forumınıñ başqarma byurosınıñ citäkçese Azat İslaevqa häm kongress räise Rinat Zakirovqa räxmätlären citkerdelär. Alıp baruçılarğa quşılıp“Tatar yäşläre dönya ömete!”,“Tatarlar bergä dawıl ciñä!”- digän yañğıraşlı süzlärne barıbız bergä qabatlıy başladıq. Xaywan ğına qıçqırışqannan soñ çaqırılğan qunaqlarnıñ berse -ataqlı radioşäxes, di-djey Nur Alievnıñ bietäçägen äyttelär.



Bez biegän arada waqıt ütä tordı, ul arada ikençe çaqırılğan qunaq tanılğan cırçı Läysän Gimaeva tatar yäşlären “Yäşlegem çişmäläre” nä alıp kerep kitte. Köye diskoteka muzıkasına yaqın kiterelgängä ber ük waqıtta biedek tä cırladıq ta.



Cırlap-biep arğaç forumda cıyılğan “Qızğan Qazan” KVN komandası şayan nomerların kürsätä başladı. Çığışları uylanıp betmägängäme, ällä tawış caylanmaları döres köylänmägänme qayber mäzäklärne añlap beterep bulmadı. Yal itep alırğa yaradı inde ansı. Süzlärenä qarağanda arttırıp äytkändä şayan tellelärneñ üzlären äybät kiendergännär. Ällä qayan balqıp toralar.

“Qızğan Qazan” beraz qızdırğaç yäşlärne därtländerep cibärü niäte belän der inde säxnä türenä ciñelçä kiengän biyuçe qızlar päydä buldı. Beräwlär nişläp alarına beraz ozınraq kiem tapmadılar ikän dip suqrandı, ikençelärgä alar oşadı...



Nihayät Nur Alievqa da çirat citte. Bu yulı mäşhür di-djey üze yazğan “Minem yöräk”, “Min qoyaşta yanarmın” isemle yäşlärçä cırların başqardı. Tamaşanıñ ikençe kisägennän başlap säğät unbergä qädär tatar yäşläreneñ küñelen Nur Aliev kürde. Mäydançıqta biegän arada tirä-yağıma küz salıp aldım Azat İslaev yäşlärneñ biegänen soqlanıp qarap tora, berençe milli diskoteka bit, berençe adımnar, bälki beraz dulqınlana da torğandır. Ber çittä tatar diskotekaların oyıştıru belän şöğellänüçe Zölfät Zinnurov ta kürenep kitte. Milli diskoteka ütäçäk digän xäbär anı da çitlätep ütmägän. Dimäk “Qazan” milli mädäni üzägendä ütkän diskoteka tatar yäşlärennän başlap äydamannarın da ber binağa cıyıruğa ölgergän.



Düşämbe kiçe tatar yäşläre forumı ütkärgän milli tamaşada sizelmiçä ütep kitte. Säğät unber tuluğa biep arğan ayaqlarnı österäp, yuğarı rux belän öylärgä taralıştıq. Xäzer inde ber aydan bulası yaña tamaşaların ğına kötäse qala.

Röstäm İsxaqov

XS
SM
MD
LG