Accessibility links

Кайнар хәбәр

George Bush belän John Kerry arasında öçençe teledebat uzdı


Qazanda inde tañ atqanda dönyanıñ ikençe yağında, Quşma Ştatlarnıñ Arizona ştatındağı Tempe şähärendä, amerikan prezidentı urını öçen köräş alıp barğan George Bush häm John Kerry arasında öçençe häm soñğı teledebatlar uzdı. Säğät yarım barğan şuşı süz köräşterü nigezdä ilneñ eçke problemaları - sälämätlek saqlaw sisteması, salımnar, bala töşerü häm gay nikaxları tiräsendä barsa, Ğiraq, Äfğanstan, terrorğa qarşı köräş bu yulı da çittä qalmadı.

Saylawlarğa inde 2 atnalap qına waqıt qalıp bara, läkin şuña da qaramastan, tawışların kemgä biräçägen älegä belmägän amerikannar sanı citärlek häm şuña kürä dä teledebatlarnıñ, şul ikelänüçe xalıqqa tieşle saylaw yasawğa yardäm itü mäs''äläsendä tä''sire şaqtıy zur bula ala. Alar bu yulı inde öçençe märtäbä uzdı, häm ğomumi fiker şundıyraq - teledebatlar nigezdä demokrat nämzät John Kerry östenlege belän ütte. Ämma bu, tawış birüdä dä Kerry ciñep çığaçaq digänne añlatmıy, yarış yaqınça ike nämzätne dä bertigez yaqlaw belän bara häm xäzer alarnıñ çağıştırmaça waq qına mäs''älägä qarata qaraşı da yaqlawçılar sanın arttıra yäisä kiresençä kimetä ala. Soñğı debatlar ilneñ eçke problemaların - berençe çiratta salımnar, sälämätlek saqlawnı kamilläşterü, moñardan tış, bala töşerü häm gay nikaxlar kebek bäxäsle mäs''älälärne tikşerügä bağışlanğan ide. Kerry inde 4 yıl prezident bulıp utırğan Bushnıñ iqtisadi säyäsäten kisken tänqitläp çıqtı häm anı büdjetta zur defitsit buldıruda, eş yuğaltularnı arttıruda häm bigräk tä urta qatlam xalıq ixtiacların qayğırtmawda ğäyepläde.

Audio, John Kerry

"İldä balalarnıñ sälämätlegen saqlaw qaralmağan. Bez dönyada iñ bay il sanalabız, ämma şunı eşli almağan berdänber industriäle il bulıp torabız. Mindä bar amerikan xalqın meditsina yaqlawı belän tä''min itü planı bar, bez anı härkem öçen dä açıq itäçäkbez, härkem kongressman häm senatordağı tösle meditsina yaqlawına iä bulaçaq" dip ışandıra demokratlarnıñ nämzäte John Kerry. Bush isä üzeneñ iqtisadtağı kürsätkeçlären yaqlap, büdjet problemaları äle elekke demokrat prezident Bill Clinton çorınnan kilä, xäzer isä amerikan iqtisadı nığıy bara, monı küp kenä çit il eşçeläreneñ Amerikağa kilergä omtıluı da yaxşı kürsätä dip belderä.

Audio, George Bush

"İqtisadi säbäplär arqasında bu ilgä küp kenä keşe kilä. Häm alar biregä eşlärgä dip kilä" di George Bush häm monı, ägär dä Amerikada eşlär Kerry sürätlägänçä naçar bulsa, çit xalıq biregä aşqınıp tormas ide digän dälil itep kiterä. Bu debatlar, inde äytelgänçä, Quşma Ştatlarnıñ eçke problemaların ğına tikşerügä bağışlanğan bulsa da, Ğiraq suğışı, terrorğa qarşı köräş teması bu yulı da çittä qalmadı. Kerry Bushnı, ilne aşıq-poşıq suğışqa kertep cibärüdä häm töp iğtibarnı möhimräk sanalğan terrorğa qarşı köräştän Ğiraqqa boruda ğäyepläde. Bushnıñ elek äytkän süzlären, başta Osama bin Ladennı totarğa kiräklege, ä 6 ay ütü belän inde moña ähämiat birmäwe turında belderüen iskä alıp Kerry, "bezgä terrorğa qarşı köräş yulınnan taypılmıy barğan prezident kiräk" dip belderde.

Audio, John Kerry

Bush moña, üzeneñ terrorğa qarşı köräşkä iğtibarın kimetmäwen, Ğiraqta Saddamnı bärep töşerüne, şul suğışnıñ ber öleşe itep kürüen äytä. Amerikannarnıñ prezident nämzätläre arasındağı debatlar belän qızıqsınuı bu yulı da yuğarı buldı, anı yaqınça 47 million keşe qarağan dip xäbär itelä.

Kärim Kamal
XS
SM
MD
LG