Uzğan proğrammabızda prezident Mortaza Räximov citäkçelegendä Başqortstannıñ zur ğına wäkillegeneñ 15 üktäberdä Qazaqstanğa eş säfäre belän baraçağı turında xäbär itkän idek. Wäkillek, aldan bilgelängänçä, irtän irtük oçqıç belän Astanağa kitte. Başqortstan prezidentı matbuğat üzägennän xäbär itülärençä, Başqortstan wäkillegeneñ eş säfäre aldan äzerlängän proğrammağa yaraşlı uñışlı ütkän. İñ töp çaralarnıñ berse Astanada Başqortstannıñ daimi wäkilçelegen açu häm Üzara xezmättäşlek turında imzalanğan kileşülär belän almaşu bulğan.
Başqortstannıñ yuğarı citäkçelege dä qatnaşqan wäkillek Astanada bulğanda, Ufağa da qunaqlar kilep töşte. Mäğlüm buluınça, bar Rusiädäge kebek ük, bu könnärdä Başqortstanda da Awıl xucalığı eşçännäre bäyräme bilgelänä. Şuşı bäyräm çaralarında qatnaşu öçen, 15 üktäber irtäsendä Ufağa Mäskäwdän Rusiä Awıl xucalığı federal ağentlığı citäkçese Anatolıy Mixalev belän şuşı ağentlıqnıñ İqtisad häm federäl maqsatlı proğrammalar idaräse başlığı Aleksandr Rassqazov kilde. Qunaqlarnı Ufa hawa alanında bik zurlap, respublika premer – ministrı Rafael Baydäwlätov belän Başqortstan awıl xucalığı ministrı Griğoriy Ğorobes häm başqa räsmi şäxeslär qarşı aldı.
Mäskäwdän kilgän qunaqlar Başqortstanğa säfärläre barışında respublikanıñ qayber rayonnarında bulaçaq häm andağı aldınğı eş täcribäse belän tanışaçaq. Şulay uq alar Ufada awıl xucalığı eşçännäre köne uñayınnan tantanalı cıyılışta qatnaşa.
Soñğı yıllarda Başqortstannıñ awıl xucalığı tarmağı şaqtıy awır çorın kiçerä. Elek uñışlı ğına eşläp kilgän kümäk xucalıqlarnıñ küpçelege taralu aldında. Här rayonda xäzer unbiş – yegerme xucalıqtan otışlı eşläwçe nibarı ikeşär – öçär genä xucalıq isäplänä. Qalğannarı üzlärendä bil bögüçe krästiängä yünläp aqça da tüli almıy, üz xucalıqların üsterü öçen qäpitäl da sala almıy. Äle küp xucalıqlar ike distä yıl elek alınğan häm bügenge köndä taralıp barğan iske texnikta eşli. Alar ike –öç yıldan tämam taralıp töşäçäk, dip belderä bäysez iqtisadçılar. Şuña da qaramastan, Başqortstan citäkçelege respublikta awıl xucalığı torıqlı üseş yulında dip xalıqnı da, üzlären dä aldıy. Läkin bezneñ xalıqta «çiren yäşergän – ülgän» digän äytem bar. Menä şul xäl kilep tuuın küplär uylap ta birmi.
