Accessibility links

сишәмбе, 6 декабрь 2016, Казан вакыты 06:04

Xäter köne Ufada da iskä alındı


Başqortstannıñ ber törkem tatar zıyalıları häm tatar milli xäräkäte wäkilläre, Xäter könendä qatnaşu öçen, ruxi märkäzebez Qazanğa kitte. Älege wäkillekkä Başqortstan Tatar ictimağıy üzäge räise Ayrat Ğiniätullin citäkçelek itä. Säfärgä kitär aldınnan ul Qazandağı çaralarda üzeneñ Başqortstan tatarları isemennän çığış yasaçağın da äytte. Başqortstannıñ üzendä dä soñğı berniçä yılda Xäter köne uñayınnan qayber çaralar oyıştırıla başladı. Qazandağı kebek ük kiñ qolaçlı ütkärelmäsä dä, alarda millätebez yazmışı häm anıñ kiläçäge turında fiker alışular, tatar xalqı bäysezlegen yaqlap şähit kitüçelärne iskä alu bula. Şundıy çara Ufada bıyıl da 15 üktäber könne ütte. Başqortstandağı tanılğan tatar ğälimnäre, şulay uq tatar milli oyışmaları citäkçeläre häm aqtiv äğzaları başqalada Xäter könenä bağışlap iskä alu kiçäse ütkärde. Bıyıl ul, asılda, çäy östäle artında millät yazmışı xaqında söyläşü sıyfatında ütte. Oçraşuda Başqortstan tatarları xoquqların yaqlaw buyınça aldağı könnärdä torğan burıçlar turında da fiker alıştılar. Mäğlüm buluınça, bıyıl noyäbr ayınıñ 27 sendä Başqortstan tatarlarınıñ zur qorıltayın ütkärü kötelä. Xäter köne kiçäsenä cıyıluçılar şul qorıltayğa äzerlek bırışın da tikşerde.

XS
SM
MD
LG