Accessibility links

якшәмбе, 11 декабрь 2016, Казан вакыты 07:11

Ramazan ayı Ğiraqta yaña höcümnär belän başlandı


Ğiraqtağı amerikan ğäskärläre Ramazan ayın yuğarı xärbi äzerlek belän başlıy. Bıltır şuşı ay anda ğisyançı höcümnärneñ kisken artuı belän bilgelängän ide. Comğa könne amerikannar, mäğlüm radikal'' suğışçı Äbu Musab äl-Zärqawi yäşerenep yatqan dip farazlanğan Fälluca şähärendäge höcümen köçäytte. Kiçä Bagdadnıñ imin sanalğan "yäşel bülge"sendäge ike şartlawnı da näq menä äl-Zärqawi köçläre oyıştırğan dip xäbär itelä.

Audio

Amerikan köçläre Fällucadağı höcümnären äle comğa irtän ük başlağan ide, hawadan da, şähärneñ üzendä dä barğan şul ğäskäri operatsiä köndez dä däwam itte. Moña qädär Quşma Ştatlarnıñ xärbiläre bu şähärne atnalar buyı hawadan ğına utqa totıp kilde. Bıltırğı täcribäne iskä alıp amerikannar Ramazan ayın Ğiraq ğisyançılarına qarşı qırısraq çaralar kürep başlıy, bıltır möselmannarnıñ izge ayı Ğiraqtağı çit il ğäskärlärenä höcümnärneñ artuı belän bilgelängän ide. France Press agentlığı mäğlümatına qarağanda, şähärgä taba Quşma Ştatlarnıñ häm Ğiraq xökümäteneñ meñläp ğäskärie yul tota, alarnıñ maqsatı - Fällucada qaçıp yatqan radikal'' ğisyançılardan arınu, bigräk tä alarnıñ mäğlüm başlığı Äbu Musa äl-Zärqawine qulğa töşerü. Ğiraqta bulğan zur terror höcümnäreneñ küpçelege artında näq menä şul keşe tora häm ul Fällucada bula ala dip farazlana. Ğiraq xökümäte Bagdadtan 65 çaqrım ğına yıraqlıqta yatqan şuşı şähär wäkilläre belän söyläşülär dä başlap cibärgän ide. Premyer-ministr Ğälläwi, şähärdägelär yä äl-Zärqawine xökümät qulına tapşıra, yä alarğa qarşı zur höcüm başlanaçaq dip kisätte. Ämma Fälluca wäkilläre, bu alar ütärlek şart tügel dip belderde häm atnakiç söyläşülär özelde. Şul uq könne Bagdadnıñ amerikannar tarafınnan nıq saqlanğan "yäşel bülge"sendä ike köçle şartlaw yañğıradı, anda ülüçelär arasında 3 amerikan da bar ide. Şartlawnı oyıştıru öçen cawaplılıqnı bu yulı da äl-Zärqawineñ "Täwhid wä Cihad" törkeme aldı. Ğiraq başqalasınıñ şuşı öleşe iñ imin urın sanala, anda xökümät ähelläre, çit il keşeläre, ğäskärilär, barlığı 10 meñläp keşe yäşi. Ğiraq xakimiateneñ däwlät iminlege ölkäsendäge kiñäşçese Qasıym Daut, atnakiç höcümen oyıştıruçılarnıñ ezenä töşäçäkbez dip belderde.

Audio, Qasıym Daut

"Bu qurqaq ğämäl cäzalandırmıy qalmayaçaq, min terrorçılarğa şunı citkerergä telär idem - äl-Zärqawi häm "äl-Qaidä" citäklägän, yäisä Saddam qaldıqları oyıştırğan terrornı bez barıber ciñäçäkbez. Alar qayda ğına bulmasın, bez alar başına citäçäkbez" di Ğiraqnıñ däwlät iminlege kiñäşçese Qasıym Daut. İnde äytelgänçä, uzğan yılğı Ramazan ayı Ğiraqta köç qullanu, qan qoyunıñ kinät artuı belän bilgelängän ide. Bagdad xalqı alay da, bıyıl wäzğiat başqaçaraq, tınıçraq bulır dip ömetlänä. Alarnıñ berse radiobızğa şulay dip belderde.

Audio, Bagdad keşese

"Bez bu ayda suğışlar telämibez, xökümätneñ wäzğiatne tınıçlandıruına ömetlänäbez, çönki bu ayda suğışlar tıyılğan" di Bagdad keşese. Şuşı ömetlärgä qaramastan, comğa könne dä Ğiraq başqalasında yaña şartlaw buldı. Eçke eşlär ministrlığı mäğlümatına qarağanda, anda ber keşe hälak bulğan, Ğiraq politsiäseneñ kimendä 9 xezmätkäre törle yaralar alğan.

Kärim Kamal
XS
SM
MD
LG