Accessibility links

сишәмбе, 6 декабрь 2016, Казан вакыты 05:58

Lev Ovrutskiy: Tatarlar üzläreneñ prezidentın saylıy almağanda federalizm bula almıy


Qazanda yäşäwçe häm rus telendä icat itüçe, räsmi xakimiätlärne yış qına tar qaraşlığın häm axmaqlığın faş itep çemetkäläwçe Lev Ovrutskiy bügenge säyäsät turında qalın ğına kitap çığarğan. «Kogda respubliki bıli bol'şimi» isemle bu kitapqa Ovrutskiynıñ Mäskäw gäzitlärendä basılıp çıqqan mäqäläläre kergän.

Ber qarasañ bu waqiğa Tatarstannıñ, tatar xalqınıñ yazmışına bäyle tügel bulıp kürenä. Ämma pänceşämbe kiçendä “Tatmedia“ agentlığında şuşı kitapnıñ täqdir itü kiçäsenä iñ abruylı möstäqil' säyäsätçelär, deputatlar, jurnalistlar, din eşlekleläre dä kilgän ide. Xikmät monda Ovrutskiynıñ däräcäsendä tügel. Xikmät - bu jurnalistnıñ obyektiv fiker yörtep, eçke xaläten, Rusiä häm Tatarstan xakimiäteneñ söyäklären, eçäklären rentgen aşa kürsätüendä.

Älege kitapta häm bügenge publitsistik çığışlarında Ovrutskiy demokratiäne, grajdanlıq cämğiäten, ğädellekne yaqlağanda berkemnän dä qurqıp tormıy. Döres anı yaratmawçılar da bar. Ul üze dä qayçaq mawığa, yalğışa. Anı tege qähär suqqan yähüd bezgä qarşı dip sügep yörüçelär dä yuq tügel. Ämma barıber ul talantlı häm ğädel yaza. Bügenge Rusiä säyäsätendä bu siräk oçrıy. Şuña kürä Ovrutskiy fikerläre defitsit bulıp çığa.

Kitapnı täqdir itüdän soñ, berniçä baş möxärrir, pravoslav çirkäwe wäkile, ike yähüd zıyalısı häm säyäsät ğalime Midxät Färuqşinnıñ Ovrutskiynıñ qotlağanın kötep torıp, aña şuşı kitap häm bügenge wazğiät turında soraw birdem. Lev Ovrutskiy üz kitabınıñ töp teması federalizmnı yaqlaw dip sanıy. Ul Rusiädäge bügenge vertikal' säyäsätne nığıtuğa qarşı. Respublikalarnı häm xalıqlarnı tübänsetü, xoquqsız qaldıru anı bik borçıy. Jurnalist Lev Ovrutskiy tatarlarnı häm säyäsätçelärne üz-üzlären saqlamağannarı öçen tänqitli. Ul äwliä tügel, ämma anı xäzer böten keşe tıñlıy. Anıñ säyäsi diagnozı İrek mäydanında yañğırağan çığışlar häm şiğärlärgä täñgäl kilä. Ä çittän qarağanda qızu tatar millätçeläre häm rusça yazuçı yähüd zıyalısı ber-bersennän bik yıraq, hiç oxşaş tügel bulıp kürenä. Ä tormışta alar bik yaqın. Säyäsi xäter, zamana cilläre alarnı yaqınayta.

Rimzil Wäli

XS
SM
MD
LG