İzge Ramazan ayınıñ başlanu xäbären tatar internet säxifäläre dä tarattı. Tatarstan diniä näzaräteneñ da säxifäse bar, ämma ul yañartılmıy, şuña kürä Tatarstan möftieneñ qotlawın, başqa internet säxifälärdän genä uqıp bula. Tatarstan diniä näzaräteneñ säxifäse e-islam.ru adresında urnaşqan. Anda islam tarixı, xädislär, Qör`än, päyğämbär tormışı turında urısça, tatarça, inglizçä mäğlümat tabıp bula. Ämma, şuşı e-islam.ru saytınıñ yañalıqlar bülege daimi räweştä tulılanıp tormawı, säxifägä qızıqsınunı kimetä bara. Nicgar diniä näzaräteneñ saytı islam.nn.ru isä gel yañarıp tora. Anda Nicgar ölkäse möftieneñ möräcäğäte belän tanışıp bula, säxifädä Ramazan, digän maxsus bülek tä açılğan. Anda Nicgar möselmannarı, millättäşlärne bäyräm belän qotlıy. Ramazannıñ böyeklege turındağı fikerlären alar şiğri formağa salıp birälär, ä säxifä açılğaç uq, köygä salınğan ziker yañğırıy başlıy.
Zikerlär, Allanı danlaw global çeltärdä küp urın alıp tora. Andıy İlahi muzıkanı başqara torğan Rayhan törkeme zamança möselmannarğa yaxşı tanış. Bu häm başqa törkemneñ cırların, ziker äytülären, Qör`än ayätläreneñ audio yazmaların da www.nasheeds.narod.ru, zikr.org säxifälärendä tabarğa bula. İslam dinenä häm möselmannarnıñ kön küreşenä bağışlanğan räsmi islam.ruda da Rayxan törkemeneñ cırları belän tanışırğa bula. İslam dönyası bik zur häm törle bulğan kebek, islam dinenä bäyle saytlar da bik küp, häm törle. Google.com kebek ezläw maşinası, berniçä sekund eçendä 3 meñgä yaqın islam saytın tabıp birä. Alar kübesençä urıs, ğäräp, ingliz tellärendä bula. İkhlass.by.ru digän saytnı yasawçı Rinat Ali, üze saytlarnıñ adresların cıyğan häm alarnı internet qullanuçılar iğtibarına täqdim itä. Anda Rusiäneñ törle töbäklärendä eşläwçe, dönya buylap sibelgän islam üzäkläreneñ, mäçetläreneñ säxifälärenä çığu yulları kürsätelä. Mäsälän anda «Piterburda islam dine» digän säxifä, Kareliäneñ Kostamuksha şähärendäge möselman üzäge saytı, Perm yaqlarında eşlägän diniä näzäräte, Neftyuganskiy şähäreneñ mäçet saytı, çit il islam üzäkläre, xätta islam radiosınıñ adresları da bar. Säxifäneñ adresı ikhlass.narod.ru. Rusiä üzäk Diniä näzaräte saytı www.moslem.ru adresında urnaşqan, möselman xatın-qızlarğa www.muslima.narod.ru digän säxifä belän tanışırğa täqdim itärğä bula. Ğomumiläşterep qarağanda, şunı äytep bula, islam dine global çeltärdä zur urın alıp tora. Säxifälärdä din turında mäğlümat iñ zamança ısullar belän birelä, wäğäzlär, ayätlär, xädislär tekstlar belän genä tügel, audio faillar, tawış belän dä täqdim itelä. On-line räweştä Qör`änne uqu däresläre birelä, namaz uqu tärtiben öyrätüçe räsemnär, xätta video tasmalarnı da çeltärdä tabıp bula. Ägär dä sorawlar kilep çıqsa, küpçelek islam saytlarında, imamnardan forum, konferensiä büleklärendä cawap alu mömkinlege dä bar. Tatar internet säxifäläre, bu yaqtan, islam internet çeltärennän küpkä qalışa.Bikä Timerova.
