Accessibility links

якшәмбе, 4 декабрь 2016, Казан вакыты 05:11

Belarus saylawçıları konstitutsiäne üzgärtü referendumında häm parlament saylawlarında tawış birä


Belarusta parlament saylawları häm prezident Aleksandr Lukaşenkoğa öçençe möddätkä prezident bulıp saylanu mömkinlege birüe konstitutsion üzgäreş turında referendum ütä. Tawış birü barışın xalıqara küzätüçelär qarap tora, ämma AQŞ belän Yewropa Berlege inde aldan uq anıñ demokratik standardlarğa turı kilüenä şik belderde. Lukaşenko bu wazıyfasında 1994-nçe yıldan birle eşli. Ämma konstitutsiä ildä ber keşegä 2 märtäbä genä prezident bulıp saylanu mömkinlege birä. Bügenge referendumda menä şul çikläwne üzgärtü mäs''äläse qarala. 1996-nçı yılda ul prezidentlıq möddäten ozaytu öçen ildä ber märtäbä referendum ütkärgän ide. Könbatış küzätüçeläre ul referendumnıñ aldaşular belän ütüe turında beldersä dä prezidentlıq möddäte ozaytılıp kiläse saylawlar 2006-nçı yılda ğına ütäçäk. Bügenge referendumda konstitutsiäne üzgärtü öçen Belarustağı 7 millionlap saylawçınıñ 50 protsenttan artığı üzgäreşne yaqlawğa tieş. Ämma bu ayda 1 meñnän artıq keşe qatnaşqan fiker beleşüdä barı 41.5 protsent qına ul üzgäreşne yaqlawın belderde. Yewropana iminlen wä xezmättäşlek oyışması häm başqa küzätüçe törkemnär Belarusqa yözlärçä küzätüçe cibärde. Oppozitsion partiälär kiñküläm xärämläşülär bulır dip kötüläre turında kisätä.

Comğa könne AQŞ däwlät departamentı süzçese Richad Boucheer xäzerdän ük tawış birüneñ irekle häm ğädel bulmayaçağın kürsätüçe işarälär bar dide.

AUDİO: AQŞ häm Yewropa Berlege qat-qat Belarus xakimiätlären saylawlar häm referendumnarnı xalıqara standardlarğa turı kiterep ütkärergä çaqırdı. Qızğanıç ki, Belarus xakimiätläre ütkän saylawlar häm referendumnı oyıştırğanda üz yöklämälären ütämäde häm Yewropada iminlek wä xezmättäşlek oyışması xäbärlärenä qarağanda xäzerge kampaniädä dä ğädelsezleklär bulğan.

Bügen saylawçılar Belarusnıñ 110 äğzalıq parlamentın da saylıy. Oppozitsion partiälär parlamentta bik az urınnarğa ğına iä bulır, küpçelekne prezident tarafdarları täşkil itär dip kötelä. Tawış birü aldınnan Üzäk saylaw komissiäse törle säbäplär belän küp kenä oppozitsion namzätlärne saylawlardan çitläşterde. Şularnıñ berse prezidentqa yala yaqqan öçen uzğan comğada çitläşterelgän dielä.
XS
SM
MD
LG