Accessibility links

шимбә, 3 декабрь 2016, Казан вакыты 14:43

Xätergä säyäxät


Miting süzen işetü belän minem balaçaqta kürgän berençe may bäyrämnäre iskä töşä. Şarlar, çäçkälär, “Ura!” öndämäläre belän meñlägän xalıq Yaz häm xezmät bäyrämenä bağışlanğan miting, demonstratsiälärgä çığa ide. Ä bıyıl min berençe tapqır xäter könenä bağışlanğan mitingta buldım.
Qazan xanlığı 1552nçе yılda, xäzerge stil' belän sanağanda 12nçе oktäberdä yaulap alınğan könne iskä alu - xäter könen milli oyışmalar bıyıl 15nçе oktäberdä ütkärde. Uramda açı cil. İrek mäydanında barlığı 300gә yaqın keşe cıyılğan. Alar tatar yazmışında bulğan faciğanı - millätneñ soñğı däwläte cimerelgän könne, azatlıq öçen köräşep, şähit kitkän qaharman babalarnı iskä alırğa kilde. Cıyılışqa kilgän aq yarulıqlı äbilär, tormış täcribäsen tuplağan çal çäçle babaylar yanında az bulsa da yäşlär dä bar ide. Yañğırağan notıqlarda bügenge Rusiäneñ milli säyäsäten, anıñ vertikal' citäkçelek itü häm gubernatorlar kertü ideyälären tänqitlädelär. Tänqittän Qazannıñ xakimiät başlığı da çittä qalmadı. İzge ana ikonasın qaytaruda qatnaşqan xakimiät başlığın üzen Vatikanğa cibärep, Qazannıñ yubileen Qamıl İsxaqovsız ütkärergä kiräk digän şiğar'lär kürende. Mitingnı alıp baruçılar xalıqnı qurıqmasqa, üz köçenä ışanırğa öndädelär.
İrek mäydanınnan soñ xalıq Qazannıñ üzäk uramnarı buylap säfär qıldı. Alda barğan maşina eçendä xanbikä häm Safa Gäräy bulıp kiengän yäşlär yulbaşçı buldı. Mätäm cıyılışında qatnaşuçılar oratorlar artınnan qabatlap, uramdağı xalıqnı şaqqatırıp, “Azatlıq!”, “Allahu äkbär!”, “Tatarlar berläşegez!” dip qıçqırıp bardı. Tik öndämälär belän kilüçelärgä uramda oçrağan tatarlarnıñ bik azı ğına quşıldı. Alar çittän qarawçılar küz aldında tile keşe bulıp kürenüdän qurıqtı buğay. Şähär xakimiäte binası yanınnan ütkändä Qamıl İsxaqovqa bağışlanğan xurlaw süzläre qabatlap äytelde. Prokuraturağa citkäç, “Azatlıq” dip qıçqırdılar.
Demonstrantlar Söyembikä manarası yanında tuqtap, öylä namazın uqıdılar, xäyer-sadäqa birdelär. Namazdan soñ, Yärminkä mäydanına töşep, açlıqta utıruçı säwdägär Näfis Kaşapov yanına bardılar. Annarı qazan ziratına kittelär.
Mondıy uram yöreşen, andıy mitinglarnı min berençe tapqır kürdem. Mömkinlek bulsa andıy cıyınğa bitaraf qalmıyça tağın barır idem.
Al'bina Zäynulla, Qazan.

XS
SM
MD
LG