Accessibility links

дүшәмбе, 5 декабрь 2016, Казан вакыты 01:23

Yekaterinburg mäçetendä mäğnäle oçraşu ütte


Küptän tügel “Milli Media-Xoding” citäkçeläre Yekaterinburg şähäreneñ Ximmaş bistäsendä urnaşqan mäçettä millättäşlärebez belän oçraştılar. Ximmaş yağında tatar häm başqort xalqı küp yäşi. Monnan altı yıllap elek biredä ber iske ağaç öyne mäçet itep yasap quydılar. Ämma älege yort bäyrämnärdä üz eçenä xalıqnı sıydırıp beterä almaslıq bik keçkenä bulıp çıqtı. Bu bistädä zur mäçet saldıru xıyalı inde küptän yäşi ide. Monnan öç yıl elek yaña mäçetneñ berençe taşı da salındı. Ul waqıtta tantanada Ufadan kilgän möfti xäzrät Tälğät Tacetdin, Sverdlov ölkäse gubernatorı Eduard Rossel dä qatnaştılar.

Bügenge köndä mähabät zur mäçet bik matur bulıp üsep kilä, östenä gömbäzen dä quyğannar, anı yabıp, manara utırtsañ, eçke eşläre genä qala inde. Urındağı imam Fätxelqadıyr xäzrät äytüençä, gubernator da, ölkä tözeleş ministrı da ğözerlärne kire qaqmıylar, xäldän kilgänçä yärdäm itep toralar. Eşmäkärlär dä küp bulışqan. Soñğı yıllarda tözeleşneñ töp öleşen Sverdlov ölkä tatarlarınıñ milli-mädäni avtonomiäse citäkçese Mars Şarafulin alıp bara ikän. Ä inde biregä yörüçe möselmannar üzläre Fätxelqadıyr xäzrätneñ eşennän bik qänäğät. Alar äytüençä, ägär dä xäzrät canın-tänen birep yörmäsä, mäçetne bolay tiz kütärep bulmas ide. Milli Media-Xolding citäkçeläre mäçet qartlarınıñ xäl-äxwälläre, tormış-könküreşläre belän qızıqsındılar. Äñgämä bik canlı, qızıqlı kilep çıqtı. Babaylarnı borçığan närsälär bik küp ikän.

Süz bigräk tä mäçetkä yörüçelärneñ az buluı, yäşlär belän ike aradağı mönäsäbätlär, täwfiqsız yäşlärneñ küp buluı, bu xälneñ törle säbäpläre turında bardı. Mäçetkä yörüçe olı keşelärneñ moñ-zarın tıynaq qına çittä tıñlap utıruçı yäş kenä yegetkä iğtibar ittek. Ul Ärtä rayonınnan küçep kilgän elekkege uqıtuçı Färit Sabirov bulıp çıqtı. Anıñ da bu turıda fikeren soradıq. Cawap yözennän ul päyğämbärebez Möxämmät s.g.v. xädisläreneñ bersen misal itep kiterde. “Aqıllı, äybät qartlarıbız küp bulsa, aqıllı, äybät yäşlärebez dä küp bulır. Qartlar bezne niçek tärbiäli, bez şundıy bulırbız,” – dide ul. Bäxäskä Fätxelqadıyr xäzrät yomğaq yasadı. Yäşme bez, qartmı bez, möselman ömmätennän bulğan barıbız da berdäm bulıp yäşärgä tieşbez, dide ul.

Milli Media-Xolding citäkçeläre olı keşelärne oktäber ayınıñ berençe dekadasında bulıp uzğan ölkännär köne belän täbriklädelär. Alarğa büläk yözennän kiläse yılnıñ berençe yartısına “Saf çişmä” gazetasına buşlay yazdıru wäğdä ittelär. Bu oçraşu biredä bulğan härkem küñelendä uñay tä'sir qaldırdı. Babaylar qunaqlarnı tağın da kilergä çaqırıp qaldılar.

Fäwiä Safiullina, Yekaterinburg

XS
SM
MD
LG