Accessibility links

шимбә, 3 декабрь 2016, Казан вакыты 07:45

Flürä Ziatdinova: Rusiä Prezidentı täqdimnäre belän kileşep betä almıybız


20 üktäbergä Tatarstan Däwlät Şurasınıñ däwlät tözeleşe häm cirle üzidarä komitetınıñ utırışı bilgelängän ide. Anda deputatlar, töbäk citäkçelären östän bilgeläw kebek, mäğlüm täqdimnärgä qarata fikerlären belderergä tieş ide. Ämma komitet utırışı comğa köngä kiçekterelde. Tatarstan deputatlarınıñ, Putin täqdimnärenä qarata, törle-törle fikerdä tora. Ber Qazan gäzite, deputatlar, Putin täqdimnärenä qarata qarşı çığarğa uylıy, dip yazıp çıqsa da, Däwlät tözeleşe komitetı räise urınbasarı Flürä Ziatdinova, gäzit xäbären raslamadı. Ul äytkänçä, «Cirle xakimiätlärne formalaştıru tärtibe turında»ğı qanunğa tözätmälär proyektınıñ 1nçe uqılışı belän Tatarstan deputatları kileşergä mäcbür bula. Ämma, qanun ikençe uqılışta qaralğanda, deputatlarnıñ äytäse süzläre bulaçaq. Mäsälän alar, Rusiä Prezidentı, töbäk citäkçese itep, cirle xalıqnıñ mädäniäten, telen belgän säyäsätçene genä täqdim itsen, digän matdäne kertergä teli. «Cirle qanun çığaru cıyılışı 2 tapqır täqdim itkän citäkçegä qarşı tawış birsä, parlament quyıp taratıla», digän matdä belän dä kileşä almıy deputatlar. Tatarstan qanun çığaruçıları anıñ urınına kileşterü komissiäsen oyıştırırğa täqdim itä. İnde boları da bulmasa, säyäsätçelärneñ, bu qanun ozaqqa barmas, digän ömetläre dä bar. Flürä Ziatdinova Rusiä Üzäk saylaw komissiäse räise süzlärenä sıltap, qanun 10 yılğa ğına qabul itelüenä ömetlänüen äytte. Şuşı säyäsi ähämiätkä iä bulğan qanunnı qararğa tieşle komitet utırışnıñ kiçekterelüen ul, texnik yaqtan äzerlänep betmäw belän añlattı.

Bikä Timerova.

XS
SM
MD
LG