Accessibility links

Köndälek xäbärlär


Çärşämbe könne Mäskäw üzägendäge Bökre küperdä Profsoyuzlar oyıştırğan miting, zabastovka görläsä, Qazanda andıy xällär bulmadı. Eş xaqları belän qänäğät bulmağan byudjet xezmätkärläre isemennän profsoyuz liderları xökümät wäkilläre belän bergä kiñäşmä ütkärdelär. Bu turıda bügenge tapşıruıbızda maxsus yazma işetersez. Äye, Tatarstanda uqıtuçılar, tabiplar, mädäniät xezmätkärläre artıq tuyıp, sikermäsä dä, alarğa tüläw mäs’äläse, kiläse yılda artaçaq bäyälärne eş xaqları belän quıp totu çaraları turında uramda qıçqırıp tügel, ä tieşle cirdä, tieşle keşelär söyläşä. Eş xaqın tülämäw dä kimi bara dilär. Tağın ber üzençälek. Başqa waqıtlarda kommunistlarnıñ häm profsoyuzlarnıñ cıyınnarı Üzäk park qarşındağı mäydanda ütä ide. Bu yulı säyäsät belän şöğellänüçelärgä andıy mömkinlek birelmi, çönki älege urın tözeleş mäydanına äylängän. Maşinalar häm keşelär küp yörüçe Yerşov uramı menä inde ike ay buıp quyılğan. Şunlıqtan, şähär üzägendä fälän cirdän tögän cirgä barırğa teläwçelär maşinaları belän çiratta toralar, maxsus qaldırılğan uram-tıqrıqlardan xäräkät itälär. Yul bökeläre üze ber zabastovkanı xäterlätä. Şuşı arada Wişnewskaya uramınnan Üzäk parkı qarşındağı cir astına kerep kitä torğan yul tözü tämamlanırğa tieş. Şunsız Qazan üzäge irekle şähärgä oşamağan. Ğäyre räsmi xäbärlärgä qarağanda, Qazannıñ meñyıllığına äzerlänü komissiäse şuşı atna axırında cıyılırğa mömkin. Anda Rusiäneñ finans ministrı Aleksey Qudrin kilüe kötelä. Bäyrämgä äzerlängän Qazan aqça qıtlığı kiçerä. Meñellıq turında qayber säyäsi dairälär imeş-mimeşlär dä çığara. Oгонек jurnalında Vadim Yegorovnıñ Qazanğa meñ tügel, ä 500 genä yıl digän yawız mäqäläse basılıp çıqtı. Pänceşämbe könne Vremya i Dengi gäcitendä tarixçılar Rafael Xäkimov, Mirqasıym Ğosmanov, Ayrat Sitdikov Wadim Yegorovqa qarşı çığıp, Qazannıñ meñyıllığı ğalimnär tarafınnan raslanğan häm tanılğan digän belderü yasadılar.Belorussiädä yul qazasında OBSE wäkilläre utırğan avtobus häm WAZ maşinası bärelep, qorbannar buluı turında xäbär itelgän ide. Älege avtobus bärelgän maşinada Qazandağı neft' eşkärtü belän şöğellänüçe fänni institut xezmätkärläre Ayrat Xäydärov, Genrix Käviev häm Yekaterina Nazarenko bulğan. Sişämbe könne Qazandağı barlıq telekompaniälär Näfis Kaşapovnıñ açlıq demonstratsiäse anıñ Mäskäwgä yulda tuqtap törle şähärlärdä tuqtap, açlıq totarğa cıyınuı turında reportajlar kürsättelär. Tapşırularnıñ küpçelege Kaşapovlar eşquarlıqtan bigräk millätçelek, ekstremizm belän ayırılıp toralar, üz käsepläre turında mäğlümatnı döres birmilär, digän ğayepläw ruxında äzerlängän ide. Qazanda böten Rusiädäge kebek ük xällär şundıyraq.

Rimzil Wäli, Qazan

XS
SM
MD
LG