21 oktäber könne respublika Däwlät Şurasınıñ Prezidium utırışı uzdı. Anıñ qararı nigezendä deputatlar üzläreneñ çirattağı sessiälärenä 25 oktäber könne cıyılaçaq. Ul arada deputatlar älege utırışqa inde äzerlänä dä başladı. Mäsälän, Däwlät Şurasınıñ Mädäniät, fän, mäğärif häm milli mäs’älälär komissiäsenä kerüçelär kiläse yıl byudjetın tikşergännär. Xäyer, bu xaqta sez bezneñ programmada tulıraq xäbär işetersez äle. Prezidium utırışında şulay uq kiläçäktä deputatlar öçen yaña utırışlar zalı tözeläçäge turında da äytelde. Mintimer Şäymiev isä pänceşämbe könne respublikanıñ Çirmeşän rayonına bulıp qayttı. Anda ul häm xökümät wäkilläre yaña binalar açuda qatnaştı, rayonnıñ iqtisadi häm sotsial’ torışı belän tanıştı.
Tatarstannıñ häm Rusiäneñ Xisap palataları üzara xezmättäşlek turında kileşü imzalarğa cıyına. Monıñ öçen respublikanıñ Xisaplaw palatası wäkilläre, Däwlät Şurası räise 22 oktäberdä Mäskäwdä bulaçaq. Kileşüne imzalawda Sergey Stepaşin da qatnaşır, dip kötelä. Xäyer, älege kileşü bulmağanda da, Rusiäneñ Xisaplaw palatası Tatarstannıñ berniçä rayonında häm oyışmasında finans eşlären alıp baruda bozular inde tapqan ide. Xäzer kontrol’ tağı da köçäytelergä mömkin. Läkin respublikada tärtip bozu oçraqların cirle kontrol’ itü oyışmaları da tikşerep tora. Şuşı könnärdä genä Tatarstan prokurorı Kafil Ämirov Arça rayonı xakimiäte başlığı Almas Nazırov östennän cinayät eşe quzğatu turında qarar qabul itte. Arça rayonı başlığı xezmät wazifaların şäxsi mänfäğätlärdä qullanuda ğäyeplänä. Älege qarar rayon xalqınıñ respublika häm Rusiä prokuraturalarına küpsanlı möräcäğätlärennän soñ qabul itelgän.
Bu könnärdä Qazanda Rusiäneñ Transport tarmağındağı federal’ xezmäteneñ citäkçese Aleksandr Nerad’ko bulıp kitte. Ul respublikada Qazannıñ meñyıllığına tözelep häm tözekländerep beterelergä tieş transport tarmağındağı obyektlar belän tanıştı. Bäyrämgä äzerlek planına 3 öre obyekt – Qazan aeroportı, şähäryanı vokzalı häm başqalanıñ yılğa portı kertelgän. Alar barısı da däwlät qulında bulu säbäple, tözekländerü eşlären finanslawda xosusıy investorlar tabu qıyın. Şuña da, remont eşlären byudjet aqçalarına başqarırğa turı kilä. Tözekländerü öleşçä inde başlandı da. Läkin alarğa Tatarstannıñ ğına aqçası citmi, ä federal’ üzäktän finanslarnı älegä birmilär. Xäyer, Aleksandr Nerad’ko tatarstanlılarnıñ bar täqdim, teläklären dä tıñlap, xuplap kitte. Xäzer bar ömet atna axırında Aleksey Kudrin citäkçelegendä uzaçaq Qazannıñ meñyıllığına äzerlek komissiäse utırışına.
21 oktäber könne Tatarstanda näşer itelä torğan Qazan jurnalı üzeneñ 10 yıllıq yubileyın bäyräm itte. Älege uñaydan tantana Salix Säydäşev isemendäge Zur konsertlar zalında uzdı. Ğomumän, bu könnärdä respublikanıñ berniçä matbağası üzeneñ tuğan könen bilgeläp ütä. Çärşämbedä 85 yäşlegen balalar öçen basıla torğan Sabantuy gäcite bäyräm itsä, 25 oktäberdä tuğan könen Molodej’ Tatarstana bilgeläp ütäçäk. Älege gäcit basıla başlağanğa da 85 yıl tula.
Gölnaz İlgizär
