İlham Şakirov ber awılğa, berençe konsertınnan soñ berniçä yıl uzğaç ikençe märtäbä konsert quyarğa kilä. Şunda ber elekkege tanışı: “İlham, sin äle dä cırlap yöriseñme, berär eşkä urnaşmadıñ meni?”- sorap quyğan ikän. Çınlap ta, sänğät keşelären bik citdi qabul itmäw taralğan küreneş. Cırlap yörü köräk totıp eşläw belen ber tügel bit imeş. Ä şuşı köräk totıp eşlämäs öçen, respublikanıñ iñ tanılğan sänğätqärlärennän hönär ostalıqlarına töşener öçen 4-5 yıl uqırğa kiräk. Bu uqu yortın 35 yıl däwamında tämamlap çıqqan kiçäge 11 meñnän artıq studentlar uqu däwerendä alğan belemnären ilneñ küp kenä töbäklärendä tormışqa aşıralar. Cırlıylar, biilär, kitapxanälärdä mäğrifät taratalar.
Universitetnıñ prorektorı Nail Safiullin söyli:
Bügenge köndä universitet qısasında 3 institut, biş fakul'tet eşli. 28 belgeçlek buyınça belem biräbez. Başlanğan çorda ike genä belgeçlek- kitapxanäçelär häm teatr buyınça açılğan ide
Filüsä Arslanova bügenge köndä mädäniät häm sänğät universitetında uqıta, dotsent. Ul älege uqu yortında berençe çığarılış studentları arasında bulğan. Anıñ süzlärenä qarağanda, xäzer inde universitet bötenläy başqa. Ä elegräk niçek bulğan?
1971 yılda uqırğa kerdem. Xor bülegenä. 60 keşe uqıy idek. İke törkem bulıp. Berençe törkemdä muzıka beleme bulğannar, ikençesendä berençel muzıkal beleme bulmağannar. Ul waqıtta bezgä bik küñelle ide. Teatr, xor belgeçläre, zur ğalimnär uqıtalar ide bezne. Öç qatlı iske binada uqıy başladıq bez, äle yañasınıñ eze dä yuq ide Bügenge köndä universitet Tatarstannan tış, kürşe respublikalar, ğomumän böten tatar dönyası öçen mädäniät xezmätkärläre äzerli. Mäsälän, Çuaşstan tatarları arasınnan ğına da bu uqu yortın 100 millättäşebez tämamlağan. Bu xaqta universitet bäyrämenä kilgän Çuaşstan Tatar ictimaği üzäge räise Färit Gıybatdinov söyli
Bu universitet belän minem ğailäm bäylängän. Üzem dä monda uqıdım, xäzer ike qızım uqıy. Monnan tış 12 şäkertem bu uqu yortın beterde. Çuaşstannan barlığı 100 läp keşe monda belem aldı
Nail Safiullin çit töbäklärdän kilgän studentlar temasın bolay däwam itä
Räzän ölkäsennän dä, Çuaş, Mari respublikalarınnan da, yıraq seberdän dä bar studentlar bezdä. Küp töbäklärdän. 25 icat kollektivı bar bezneñ. Menä xäzer keräşen tatarları kollektivı tuplıybız. Başqortstandağı “Nur” teatrı öçen studentlar äzerlibez. Alar bıyıl uqıp beterälär inde. Barı tik bezneñ universitetta ğına milli sänğät institutı bar. Ul çit töbäklär belän eşli. Şul isäptän, tatar kongressı belän berlektä dä
İnde bügenge bäyrämgä kilgändä, ul berniçä fänni konferensiä häm universitet studentları qatnaşında konsert belän bilgeläp ütelde. Bäyräm uñayınnan, Tatarstan prezidentı Mintimer Şäymiev häm başqa citäkçelär dä qotladı. Tantanalı cıyılışta Tatarstan Däwlät Sovetı räise Färit Möxämmätşin da qatnaştı.
Räfis Cämdixan
