Accessibility links

шимбә, 10 декабрь 2016, Казан вакыты 21:44

Yekaterinburg şähärendä "Uralnıñ folklor cäye" dip atalğan cır bäyräme bulıp uzdı


Andıy bäyrämnär Sverdlov ölkä fol'klor yortı tarafınnan här yılnı üzenä kürä ber törle otçet räweşendä oyıştırıla. Ğädättä här cäyne fol'klor yortı xezmätkärläre törle töbäklärdä xalıq awız icatın, ğöref-ğadätlären öyränü buyınça ekspeditsiälär uzdıralar. İñ qızıqlı eksponatlarnı Yekaterinburg tamaşaçısına kürsätergä alıp kilälär.

Äytergä kiräk, här yılnı da mondıy bäyrämnärdä başqa xalıqlar arasında tatar xalıq fol'klorı zur urın tota. Bu yulı da säxnädä bu yaqlarğa ğına xas üzençälekle milli kiemnär kiep, borınğı köygä tatar xalıq cırları suzğan äbilärne, awız garmunı belän üze köy çığarıp, ayaqlarına küz iärmäslek matur itep biegän bik olı yäştäge apanı, ber törkem yäşlärneñ borınğı kiçke uyınnı gäwdäländerep biegän kümäk biyuen tamaşaçı bik yaratıp qarşı aldı.

Bıyıl fol'klor bäyrämenä dip Tübän Sırğa rayonınıñ Şäkür awılı kollektivın saylap kitergännär ikän. Awıl xakimiäte başlığı Abdulla äfände Açkamov citäkçelegendä ölkä üzägenä ostalıqların kürsätergä dip kilgän şäkürlelär bu säyäxättän üzläre dä bik qänäğät qaldılar.

Sverdlov ölkäse fol'klor yortınıñ äydäp baruçı belgeçe Svetlana xanım Quçevasova äytüençä, mondıy bäyrämnär xalıqlar duslığın tağın da nığıta, millätlärneñ ber-bersenä qarata xörmäten arttıra.

Fäwiä Safiullina.Yekaterinburg.

XS
SM
MD
LG