Britaniädä xakimiättä bulğan Leyborist partiäseneñ üz eçendäge qarşılıqlarğa qaramastan bügen xökümät Amerika Quşma Ştatları üteneçe nigezendä Ğiraqtağı Britaniä ğaskärlären ilneñ üzäk töbäklärenä küçerü turında qarar qabul itte. Saqlanu ministrı Geoff Hoon, xärbi belgeçlär – ğaskärlär öçen qurqınıç däräcäse qabul itelerlek digän näticägä kilde, dip belderde: "Xärbilär kiñäşenä nigezlänep bez Amerika Quşma Ştatlarnıñ yardäm üteneçen qabul itergä buldıq," dide Hoon. Amerikan ğaskärlärenä yardämgä berniçä atna eçendä 850gä yaqın britan xärbie kiläçäk. Alarnı qaya küçeräçäkläre turında tögäl genä xäbär itelmi. Ğiraq tışqı eşlär ministrı Hoşyar Zebari, Berläşkän Millätlär Oyışması ğinwar ayında ütäçäk saylawlarğa äzerlekkä tieşençä yardäm itmi dip şikäyät belderde. Ğiraq, saylaw belgeçläre az bulır dip kötmägän ide, dide Zebari. Ämma çit il belgeçläreneñ kilmäw säbäbe – Ğiraqta iminlek bulmawı, dide ministr. Uzğan yıl Berläşkän Millätlär Oyışmasınıñ Bağdadtağı wäkilçelegenä höcüm yasalıp 22 keşe, şul sanda oyışmanıñ yuğarı wäkile Sergio Vieiro de Mello hälak bulğannan soñ wäkilçelek üz xezmätkärlären Ğiraqtan çığarğan ide. Tağın ber xäbär – Amerikan xärbie serjant İvan Frederick, Abu Ğraib törmäse totqınnarın fizik häm censi ezärlekläwdä ğayeplänep 8 yıl törmä cäzasına xökem itelde.
