Accessibility links

дүшәмбе, 5 декабрь 2016, Казан вакыты 23:36

AQŞ üteneçe belän Britania 850 xärbien könyaq Giraqtan Bagdad tiräsenä küçerä


Koalitsiä citäkçeläre äytüeçä, bu östämä köçlär başqala töbägendä kizü kötü belän şögellänäçäk. Näticädä amerikan xärbiläreneñ, Falluca kebek qaynar urınnarda, ğisyançılarğa qarşı xälitkeç ğämällär başqaru öçen mömkinlege artaçaq.

Ğiraqnıñ könyağında, Basra şähäre tiräsendä urnaşqan Britan xärbilären Bagdad astına küçerü turında süzlär küptän yöri ide. Atnakiçtä Britania saqlanu ministrı Geoff Hoon bar imeş-mimeşlärgä noqta quydı:

Audio (Geoff Hoon): "Här yaqlap centekläp tikşergännän soñ ştab başlıqları miña Britan köçläreneñ bu ğämälgä bara aluın, bu adımnıñ xärbi yaqtan aqlanğan, qurqınıç däräcäsäneñ qabul iterlek buluın xäbär itte."

Bagdad astına barlığı 850 xärbi küçerelä. Hoon süzlärençä alar anda çiklängän waqıtqa kiterelä. Ştab başlığı general Michael Walker iñ kübe, ber ayğa, dide.

Washington Londonnıñ bu adımın xuplap qarşı aldı. Däwlät departamentı süzçese Richard Boucher:

Audio (Richard Boucher): "Bez saqlanu ministrı Hoon qararına xuplaw belderäbez. Britania üzen tağın ber tapqır Ğiraq xalqına, üz ilendä tärtip urnaştıruda yärdäm itkän küpmillätle köçlärneñ ışanıçlı tarafdarı itep kürsätte."

Britanianeñ üzendä isä bu qarar tirän qarşılıqlarğa säbäp buldı. Xärbilär çağıştırmaça tınıç könyaqtan, küpkä qurqınıçraq üzäkkä küçerelä, yağni ut astına elägä ala. Citmäsä näq şuşı könnärdä amerikan xärbiläre Falluca tiräsendä xäl itkeç ğämällärgä äzerlänä.

Amerikan oçqıçları anda, ğisyançılar nığıtması dip sanalğan urınnarnı inde berniçä atna utqa tota. Ğiraq tabipları tınıç xalıq arasında küp sanlı qorbannar bar dip xäbär itä. Londonda, xäzer Ğiraqlılar şuşı qorbannar öçen britan xärbilären ğäyeplärgä mömkin digän qurqular bar.

Küzätüçelär bu adımnıñ Quşma Ştatlarda ütäçäk saylawlar aldınnan yasaluına da iğtibar itä. Bu Blairnıñ Bushnı xuplaw ğämäle tügelme, digän soraw quya. Hoon monı fäqät xärbi ğämäl, Ğiraqta ğıinwar ayında ütäçäk saylawlar aldınnan tärtip urnaştıru tırışlığı dip atadı.

850 xärbineñ kübese Şotlandiäneñ mäşxür Black Watch berämlegennän. Bu yaxşı qorallanğan häm täcribäle xärbilär uzğan yıl Saddamnı bärep töşerüdä qatnaştı. Ber yaqtan, Amerikanıñ yözlägän meñ xärbie belän çağıştırğanda berniçä yöz britan xärbie zur köç tügel. Ämmä xärbi belgeç Christopher Langton süzlärençä, alarnıñ da faydası bulaçaq:

Audio (Christopher Langton): "Quşma Ştatlarnıñ anda 130 meñläp xärbie bar. Alğı-saf büleklärneñ kübese bäreleştä qatnaşa. Läkin qalğannırı – rezervistlar, milli gvardiä bülekläre – alar idarä, täeminatta, yağni bäreleşkä yaraqlı tügel. Britan xärbiläreneñ äzerlege monnan da kim tügel."

Langton süzlärençä, Bagdad astına küçereläse Britan xärbiläreneñ färmannı kemnän alaçağı älegä açıqlanıp betmägän. Ğömümän, alar Britania citäkçelege astında qalaçaq. Şul uq waqıtta, köndälek ğämällärdä amerikan komandirlarına buysınaçaq.

-Ali Gilmi
XS
SM
MD
LG