Accessibility links

сишәмбе, 6 декабрь 2016, Казан вакыты 19:11

Rusiä Däwlät Duması Kyoto kileşüen rasladı


Rusiä Däwlät Duması bügen Kyoto kileşüen rasladı. Parlament başlığı Boris Grızlov süzlärenä qarağanda Rusiä qatnaşmasa älege kileşü ğamälgä kerä almıy ide: "Kyoto kileşüe eşläsen öçen kileşügä kergän illärneñ hawağa yapma gaz çığaruı – ğömüm külämneñ 55%tın täşkil itetergä tieş. Xäzergä qadär bu – 44%nı täşkil itä ide. Rusiäneñ öleşenä 17% tiä, şulay itep Rusiäneñ quşıluı belän Kyoto kileşüe eşli başlayaçaq," dide Rusiä parlamentı başlığı Grızlov. 2001nçe yılda Amerika Quşma Ştatları Kyoto kileşüennän çıqtı. Kyoto protokolı – global cılınuğa qarşı çaralarnı küz aldında tota. Däwlät Duması tarafınnan raslanğan bu qanun ölgese şulay uq Federasiä Şurasında qaralıp imzalar öçen prezident Vladimir Putinğa cibärelergä tieş. Älege kileşü 1997nçe yılda Yaponiäneñ Kyoto şähärendä qabul itelde. Rusiä aña 1999nçı yılda kerde. Däwlät Duması bügen şulay uq Mäskäwneñ Yevropa Berlege belän Xezmättäşlek Kileşüen 10 yaña äğzağa da ozaytunı rasladı. Berlekneñ kiñäyüenä ber ay qalğanda, april ayında qabul itelgän bu kileşü – Rusiä belän Yevropa Berlege arasında säyäsi häm iqtisadi bäyläneşlärne bilgeli. Rusiä bügen Gruziä häm Azerbaycan belän çik buyın açtı. Çiklär Beslandağı mäktäp faciğasennän birle yabıq ide. Mäskäw bu adımnı – kürşe illärdän çeçen suğışçılarınıñ ütep kerüen buldırmas öçen yasadı. Gruziä häm Ärmänstan bu ğamäl iqtisadqa ziyan salaçaq dip, qararğa qarşı çıqqan ide.

XS
SM
MD
LG