Accessibility links

шимбә, 3 декабрь 2016, Казан вакыты 14:38

Qazanda Putin täqdimnärenä qarşı çaralar başlandı


Rusiä prezidentı Vladimir Putin täqdim itkän däwlät tözeleşendäge üzgärtep qorular Tatarstanda qayber cämäğätçelek tarafınnan xuplanmadı häm alay ğına da tügel, rizasızlıq belderep uramnarda säyäsi çaralar uzdıruğa barıp citte. Şimbä könne Qamal isemendäge teatr mäydanı qarşında “Созидание” ictimaği xäräkäte “Demokratiäne saqlıyq” digän şiğär astında miting uzdırıluı turında xäbär itkän idek. Ällä kön suıq bulğanğa, ällä inde demokratik prinsiplar bigük xalıqnıñ küñel şäriflärenä yaqın bulmağanğa keşe küp tügel ide. 300 läp kenä. Anıñ qarawı, Ayrat Şäripov arqasında ğına torğan “Созидание” tarafdarları ğına tügel, ä başqa, törle säyäsi qaraşlarda torğan oyışma wäkilläre dä qatnaştı. Kommunistlar partiäse belän milli xäräkät wäkilläre, yä bulmasa, qayçandır suverenlıq ideyäsına qarşı torğan “Согласие” törkeme ber taläplär astında tuplanu üze ber säyäsi waqiğa bit. Ä säyäsi taläplär isä “Demokratiäne saqlıyq”, “Tatarstan prezidentın saylawlar bulırğa tieş” digän şiğärlär töbäk citäkçelären xalıq saylarğa, Däwlät Dumasına saylawlar partiälär isemlege belän genä bulmasqa tieş digänne añlata. Robert Sadıyqov, Tatarstan parlamentı deputatı, Kommunistlar fraksiäse, Fändäs Safiullin, elekkege Däwlät Duması deputatı, Zäki Zäynullin- TİÜneñ ber qanatı liderı häm başqa cämäğät eşlekleläreneñ fikerläre şulay urtaq bulıp ürelep bardı.

Şimbä mitingında tatarça çığış yasağan yazuçı Mösäğiyt Xäbibullin, Putinnıñ soñğı täqdimnären Rusiäne yuqqa çığaraçaq, bu Öçençe Rim, Vizantiä imperiäläre çire belän awıru dip söyläde. “Согласие” oyışması wäkile, Rusiä konfederatsiä bulırğa tieş dip belderde.

Miting soñında rezolyutsiä qabul itelde. Ayrat Şäripov, bügenge köndä Tatarstanda Putin täqdimnärenä qarşı uram aksiäläre oyıştırğan berdän-ber oyışma-“Sozidanie” liderı şimbä köne miting belän genä tuqtap qalmadı, ä düşämbedä Tatarstan Däwlät Sovetı binası qarşında şul uq taläplär belän piket ütkerde. Anda qatnaşqan 30 lap keşe dä, şulay uq, törle säyäsi oyışmalardan kilgännär ide.

Töbäk citäkçelären saylarğa kiräk, çönki bezneñ saylaw xoquqlarıbız bar.

Bezgä bilgelängän keşelär kiräkmi, xalıq saylasın-şunı taläp itäbez.

Xalıq durak tügel ul, oşağanın saylar

Piketta toruçılar yanına deputatlardan şul uq Robert Sadıyqov qına kilde. Ul şimbä mitingıyndagı fikerlären qabatladı.

Berençedän bu Konstitutsiägä qarşı kilä. Bu Konstitutsion perevorot. Prezidentnıñ Konstitutsiädä wäqälätläre yazılğan. Anda açıq äytelgän, närsä eşli ala, närsä yuq. Anda töbäk citäkçelären bilgeli, urınınnan ala digän bernärsä dä yuq. Putin täqdimnäre xalıqnıñ xoquqın tartıp alu bula. Beslanğa anıñ ber qatnaşı da yuq.

Piket axırında, Ayrat Şäripov “Azatlıq”qa üzeneñ fikerläre belän urtaqlaştı.

Tawışnı da, rizasızlıqnı da kürsätergä kiräk. Läkin xalıqnıñ az kilüe belän qänäğät tügelmen. Bötenese añlıy, läkin öydä genä utıralar. Xäzer keşe uramnarğa çığarğa tieş. Köräşmäsäñ bernärsägä ireşep bulmıy. Böten cirdä iğlannar yabıştırılğan, TVdan häm radiodan belderülär birelde. Läkin çıqmadılar mäydanğa. Bötenesen persona' çaqırıp bulmıy bit inde. Bötenese demokratiä dip söylilär, ä qaya soñ alar xäzer

Ayrat Şäripov kiläse aksiälär Tatarstan Däwlät sovetı düşämbe könne nindi qarar qabul itügä bäyle dip belderde.

Rafis Cämdixan

XS
SM
MD
LG